Qyzylordadaǵy sport mektep-ınternaty endi stýdentterdi de daıarlaıdy
QYZYLORDA. QazAqparat - Qyzylorda qalasyndaǵy Jalańtas Bahadúr atyndaǵy Qyzylorda oblystyq mamandandyrylǵan mektep-ınternatyna endi dene tárbıesi jáne sport mamandyǵy boıynsha stýdentter daıarlaıtyn mektep-ınternat jáne kolledj mártebesi berildi, dep habarlaıdy QazAqparat tilshisi.
Qyzylorda oblysynyń ákimi Qyrymbek Kósherbaev oqý ornynyń jumysymen tanysyp, ujymdy jańa oqý jylymen quttyqtady.
«2001 jyly Qyzylorda oblysynda sportta daryndy balalarǵa arnalǵan mektep-ınternat bolyp tuńǵysh ret ashylǵan búgingi mektep-ınternat-kolledjdiń tarıhy tereń. Talaı qazaq balasy bilim alyp, el ıgiligine qyzmet atqarýǵa ómirlik joldamamen attandy. Bilim men tárbıe berý jolynda esimderi elge tanymal, Álem, Azııa chempıondary men Olımpıada júldegerleri túlep shyqty. Aýyr atletıkadan Olımpıada oıyndarynyń qola júldegeri Aleksandr Zaıchıkov, Olımpıada oıyndarynyń qatysýshylary, Álem chempıonatynyń kúmis júldegeri Almas Óteshov, erkin kúresten 3 dúrkin Azııa chempıony Dáýlet Nııazbekov, dzıýdodan jasóspirimder Olımpıada oıyndarynyń chempıony, tuńǵysh Álem chempıony Baýyrjan Jaýyntaev, erkin kúresten Olımpıada oıyndarynyń qatysýshysy Ǵalymjan Óserbaev, aýyr atletıkadan Álem chempıonatynyń qatysýshysy Qýanysh Rahatov syndy sportshylarymyzdy maqtanyshpen aıta alamyz. Igi bastamalaryńyzǵa shyǵarmashylyq tabys, jańa jetistikter men jeńister, pedagogıkalyq izdenis, jańa serpin tileımin» - dedi oblys ákimi.
Mektep-ınternattyń 5 synybynda 200 oqýshy oqıdy, al kolledjde «Dene tárbıesi jáne sport» mamandyǵy boıynsha 20 stýdent bilim alýda. Bıylǵy jyly oqý ornynda 8 QR sport sheberi, 38 sport sheberligine úmitker daıarlanyp, ulttyq quramanyń qataryna 31 óren qosyldy.
Ústimizdegi jyldyń qazan aıynda Argentınanyń Býenos-Aıres qalasynda ótetin ІІІ jazǵy jasóspirimder arasyndaǵy Olımpıada oıyndaryna mektep-ınternat oqýshylary Dıas Bahradın, Elnýra Nurlanova baıdarka jáne kanoeden esý boıynsha, al Erasyl Ergenbaı men Esengeldi Sápı aýyr atletıkadan qatysady.
