Qyzylordadaǵy shyny zaýytynyń qurylysy jandandy
Qazir mundaǵy qurylys jumystary aıtarlyqtaı alǵa jyljydy. Jumys qarqyny da kúsheıe túskeni baıqalady,dep habarlaıdy QazAqparat tilshisi.
Jalpy, jyldyq qýaty 197 myń tonna ónim shyǵarýǵa jetetin zaýyt qurylysy 2015-2019 jyldarǵa arnalǵan memlekettik ındýstrııalyq-ınnovatsııalyq damý baǵdarlamasy sheńberinde qolǵa alyndy. Bastamashysy «Orda Glass LTD» JShS. Aǵymdaǵy jyldyń mamyr aıynda Beıjiń qalasynda «Bir beldeý, bir jol» halyqaralyq forýmy ótkeni belgili. Osy alqaly jıynda Qazaqstan men Qytaı memleketteri basshylarynyń kezdesýi aıasynda qytaılyq «Chaına Trıýmf» kompanııasy men «Orda Glass LTD» seriktestigi arasynda memorandým jasaldy. Osydan soń shilde aıynda qurylys-montaj jumystaryn birlese atqarý jónindegi kelisimge qol qoıyldy.
Qoıma ishinde osy zaýytta bolashaqta iske qosylatyn tehnıkalar tur. Qaz-qatar tizilgen qurylǵylar AQSh, Italııa, Belgııa, Fınlıandııa elderinen ákelingen. Tipti, shyny jınaıtyn robottar da saqadaı saı ázir. Mamandar mundaǵy qurylys jumystaryn mejelengen merziminde aıaqtaımyz dep otyr. Atshaptyrym aýmaqty alyp jatqan qoımada da qyrýar tirlik atqarylyp jatyr.
Zaýytty aldaǵy 2018 jyldyń alǵashqy jartyjyldyǵynda iske qosý josparlanyp otyrǵanyn aıta ketken jón. «Orda Glass LTD» JShS qurylys jónindegi dırektory Begaly Toqaevtyń aıtýynsha, qazir munda AQSh, Fınlıandııa jáne Qytaıdan qajetti jabdyqtyń 96 paıyzy jetkizilgen. Mamandar metall bólshekterin qurastyrýda. Reseı, Ózbekstan men Túrkııa yqtımal ónim paıdalanýshylar qatarynda bolyp otyr. Otandyq mamandar qytaılyq áriptesterimen birge kún batareıalary, smartfondar men planshetterge arnap óte názik shyny shyǵaratyn zaýyttyń ekinshi kezeńin jalǵastyrmaq. Munda 300 jańa jumys orny ashylady dep kútilýde. Buǵan qosa bul zaýyt tolyqqandy iske qosylǵan jaǵdaıda sońǵy tehnologııalarmen jabdyqtalǵan álemdegi úshinshi zaýyt bolmaq. Buǵan deıin mundaı zaýyt tek Japonııa men Qytaıda ǵana bolǵan.
Toqtala keter jaıt, mundaı óndiristerge serpin berý Elbasynyń Ult jospary - bes ınstıtýtsıonaldyq reformany júzege asyrý jónindegi 100 naqty qadam eńbeginiń 56-qadamynda kórinis tapqan. «Ekonomıkanyń basym sektorlarynda «zákirlik ınvestorlarmen» - halyqaralyq strategııalyq seriktestermen birlesken kásiporyndar qurý jaıy aıtyldy. Sonymen birge shetelderden joǵary bilikti mamandar tartý máselesi qozǵaldy.
