Qyzylordadaǵy saıajaılardyń túıtkilderi sheshimin tabady
QYZYLORDA. QazAqparat - Qyzylorda qalasy bas josparyna ózgerister jasalýyna baılanysty qala irgesindegi «Sabalaq», «Edelveıs», «Orbıta» saıajaılary qala aýmaǵyna engiziledi. Bul biraz jyldan beri turǵyndar tarapynan aıtylyp kele jatqan máseleniń biri edi, dep habarlaıdy QazAqparat tilshisi.
Endigi kezekte atalmysh aýmaqtarda ınjenerlik ınfraqurylymdy damytýǵa jol ashylmaq. Oǵan jergilikti bıýdjetten qarjy qarastyrýǵa múmkindik týady. Burynǵy jyldarda mundaı isterdi atqarýǵa bolmaıtyn. Óıtkeni, olardyń mártebesi saıajaı esebinde sanalyp, qazyna qazanynan qarjy bólýge negiz joq edi. Buǵan deıin onda ómir súrip jatqan turǵyndar tarapynan jol, aýyz sý, jaryq máselesi jıi kóteriletin.
Qyzylorda qalasy turǵyndary jyldan-jylǵa kóbeıip keledi. Bes jyl buryn oblys ortalyǵynyń turǵyndary 240 myń adamdy quraıtyn. Endi jeti jylda ol 310 myń adamǵa jetedi dep josparlanyp otyr. Bas josparǵa engizilgen túzetýler negizinde keleshekte qala aýmaǵy 14 turǵyn aýdanǵa bólinedi. Turǵyn úı qurylysyn damytýdyń negizgi baǵyttary «Nurly jer» baǵdarlamasyna sáıkes júzege asyrylatyn bolady.
«Qyzylorda qalasynyń aýmaǵy buǵan deıin 11 myń gektardy qurady. Al jańa joba boıynsha ol 19,6 myń gektarǵa ulǵaıtylady, Al 2025 jylǵa deıin halyqtyń ómir súrý ortasyn qalyptastyrýmen qosa sharýashylyq-ekonomıkalyq, perspektıvalyq damý baǵyttaryn esepke ala otyryp, barlyq ınjenerlik ınfraqurylymdardyń syzbalaryna ózgerister engizilip otyr», - dedi Qyzylorda qalasynyń ákimi Nurlybek Nálibaev qalalyq máslıhattyń kezekti sessııasynda.
Jeke turǵyn úı qurylysy «Báıterek» turǵyn úı aýdanynda oryn tebetin bolady. Al kóp qabatty úıler qurylysy Syrdarııa ózeniniń sol jaǵalaýynda boı kóteredi. Aldaǵy ýaqytta jer kezeginde turǵan 22 myń azamattyń suranysyn qanaǵattandyrý maqsatynda 3,8 myń gektar alqapty ashý josparlanyp otyr.
