Qyzylordadaǵy saýda ortalyqtarynda karantın talaptary saqtalmaǵany anyqtaldy
Sońǵy ýaqytta Qyzylorda oblysynda koronavırýs ınfektsııasynyń taralýy kún saıyn artyp barady. Sońǵy kúnderi ár táýlikte tirkelgen naýqastardyń sany 40 adamnan asyp tur. Osyǵan baılanysty oblys prokýrorynyń ókimimmen jergilikti atqarýshy jáne ýákiletti organdardyń basshylarynan turatyn óńirlik monıtorıngilik top quryldy. Oǵan oblys basshylyǵy tarapynan qoldaý kórsetilgen.
Odan bólek qala, aýdan ortalyqtarynda 32 monıtorıngilik top jumys atqaryp, kúndelikti reıd jasalýda. Mamandar karantın ýaqytynda bazarlar, qoǵamdyq tamaqtaný oryndary, dúkender jáne taǵy da basqa qyzmet kórsetý ortalyqtaryndaǵy sanıtarlyq talaptardyń saqtalýyna baqylaý júrgizdi. Monıtorıngilik top quramynda oblystyq prokýratýra, Qyzylorda qalasy ákimdiginiń ókilderi jáne oblystyń sanıtarııalyq bas dárigeri Álııa Ábdikaıymova bar.
«Top músheleri aldymen Qyzylorda qalasyndaǵy «Otyrar» saýda úıin aralady. Onda saýda úıiniń basshylyǵyna satýshy qyzmetkerlermen betperdesiz, qolǵapsyz jumys istep jatqany eskertildi. Sondaı-aq, tómengi qabatta jeldetý júıesi jumys istemeıdi. Al «Small» saýda úıinde kassırler qolǵapsyz qyzmet atqarǵan. Buǵan baılanysty top músheleri tarapynan tıisti qujattar rásimdelip, Ákimshilik quqyq buzýshylyq týraly kodeksiniń 462-babynyń 3-bóligimen sotqa joldanǵan. Búgingi kúnge deıin 7920 nysan tekserildi. Onyń 4566-na eskertý paraqtary berildi. Bul nysandarda araqashyqtyq saqtalmaıdy, qyzmetshiler betperdesiz, qolǵapsyz jumys istep jatqany anyqtaldy», - dep málim etti Qyzylorda oblysy prokýratýrasynyń baspasóz hatshysy Ǵabıt Uzaqbaı.
Qazir Qyzylorda oblysynda 533 adam koronavırýs ınfektsııasyn juqtyrǵany anyqtaldy. Onyń 475-i jazylyp shyqty.