Qyzylordadaǵy polıtsııa qyzmeti ǵımaratyna qarýly shabýyl jasaldy - Eldos Qılymjanov
Bul týraly Ortalyq kommýnıkatsııalar qyzmetinde QR Bas prokýratýrasy 1-qyzmet bastyǵynyń orynbasary Eldos Qılymjanov aıtty, dep habarlaıdy QazAqparat tilshisi.
«Jeke adamdardyń barlyq jaǵdaılardy bilmeı, qylmystyq is týraly kópshilik aldynda pikir bildirý jaǵdaılary bar. Elimizdiń belgili sportshysynyń Facebook paraqshasynda M. esimdi azamatqa qatysty bultartpaý sharasyn negizsiz qoldanýǵa qatysty málimetter jarııalandy. Bul jaǵdaıda keıbir málimetterdi naqtylaǵym keledi. Atalǵan azamat bir top adammen birge Qyzylorda qalasynyń jergilikti polıtsııa qyzmeti ǵımaratyna qarýly shabýyl jasap, polıtsııa qyzmetkeriniń basyna aýyr jaraqat saldy degen kúdikke ilindi. Atys nátıjesinde shabýyldaýshylardyń biri kóz jumdy. Túnde M. esimdi er adam máıithanaǵa kirip, polıtsııa qyzmetkerlerine shabýyl jasaýǵa qatysqanyn jasyrý úshin qaıtys bolǵan seriktesiniń denesin urlady. Mundaı kúdiktilerdiń kúzetpen ustaý túrindegi bultartpaý sharasyn ózgertýge jatpaıdy», - dedi E. Qılymjanov.
Sonymen qatar ol Bas prokýratýra turaqty negizde qamaýda otyrǵan adamdardy ustaý jaǵdaılaryna tekserý júrgizip jatqanyn aıtty. Árbir kúdiktini jeke qabyldaý júrgiziledi, ustaý sharttaryna shaǵym bolǵan kezde – sharalar dereý qabyldanady.
