Qyzylordadaǵy ortalyq meshitte qaıyrymdylyq sharasy jasaldy
QYZYLORDA. Qyrkúıektiń 9-y. QazAqparat /Jańagúl Serdaly/ - Búgin Qyzylordadaǵy «Syrdarııa-Aqmeshit» meshitinde Aıt namazynan keıin «Syr meıirimi» ımandylyq-qaıyrymdylyq sharasy uıymdastyryldy. Oǵan oblys ákimi Bolatbek Qýandyqov pen Jalańtós Bahadúrge arnalǵan respýblıkalyq ǵylymı-tájirıbelik konferentsııaǵa kelgen qonaqtar qatysty.
Aktsııa barysynda «Jas jetkinshikterdi áleýmettik beıimdeý» ortalyǵy men patronattyq tárbıelenýshilerden 20 adamǵa qaıyrymdylyq kómek kórsetildi. «Jalańtós Bahadúr» qoǵamdyq qorynan muqtaj jandarǵa 250 myń teńge kóleminde syı-sııapat jasaldy.
Shara barysynda «Jol kartasy» baǵdarlamasy aıasynda oqýǵa túsken «Bolashaq» kolledjiniń «Kóliktik radıoelektrondyq jabdyqtardy tehnıkalyq paıdalaný» bólimshesiniń stýdenti Nurgúl Dúmekova aktsııany uıymdastyrýshylarǵa óz alǵysyn bildirdi.
Aktsııa sońynda QR Parlamenti Májilisiniń depýtaty, akademık Kenjeǵalı Saǵadıev aktsııaǵa qatysqan 5 tárbıelenýshini óz qarjysy esebinen Almaty qalasyna oqytatynyn aıtty. Al turmysy tómen otbasylaryn qoldaý jónindegi aımaqtyq qordyń tóraıymy Sapýra Ábdirahmanova jaǵdaıy tómen otbastaryna úı turmysyna kerekti kilem, ydys-aıaq tapsyrdy.
