Qyzylordadaǵy ortalyq kóshe Nursultan Nazarbaev qurmetine atalady

QYZYLORDA. QazAqparat - Qyzylorda qalasyndaǵy Jibek Joly kóshesi endi Tuńǵysh Prezıdent - Elbasy Nursultan Nazarbaev kóshesi dep atalady, dep habarlaıdy QazAqparat tilshisi.

Mundaı sheshim Qyzylorda oblystyq máslıhatynyń kezekten tys HHVIII sessııasynda qabyldandy.

Qyzylorda oblysy ákiminiń orynbasary Rýslan Rústemov QR «Qazaqstan Respýblıkasynyń ákimshilik-aýmaqtyq qurylysy týraly» Zańynyń 11-babynyń 4-1) tarmaqshasyna sáıkes, oblys ortalyqtaryndaǵy kóshelerdi qaıta ataý Respýblıkalyq onomastıkalyq komıssııasynyń qorytyndysy negizinde júrgiziletinin aıtyp, oblys ákimdiginiń qaýlysyn oblystyq máslıhattyń birlesken sheshimimen bekitýdi usyndy.

«Táýelsiz Qazaqstan memleketiniń qalyptasýynda Elbasy óz rólin abyroımen alyp ótti. Eń aldymen, Nursultan Ábishuly elimizdiń turaqtylyǵyn, yntymaqtastyqty qalyptastyryp, Qazaqstandy álemdik deńgeıde tanytty. Sondyqtan osy bastamany qoldaýdy usynamyz», - dedi oblystyq máslıhat hatshysy Naýryzbaı Baıqadamov.

Óz kezeginde depýtattar Jibek Joly kóshesin Nursultan Ábishuly Nazarbaevtyń qurmetine berý týraly sheshimdi biraýyzdan qabyldady.

Eske salaıyq, búgin QR Prezıdenti mindetin ýaqytsha atqarýǵa kirisken Qasym-Jomart Toqaev óńirlerdegi ortalyq kóshelerge QR Tuńǵysh Prezıdenti-Elbasy Nursultan Nazarbaevtyń esimin berý usynysyn jasaǵan bolatyn.