Qyzylordadaǵy órt er kisi men bala ómirin qıyp ketti
QYZYLORDA. QazAqparat - Qyzylorda oblysynda oryn alǵan órt saldarynan 55 jastaǵy er kisi men 2 jastaǵy bala kóz jumdy, dep habarlaıdy QazAqparat tilshisi QR ІІM TJK-ne silteme jasap.
Atalmysh oqıǵa Qazaly aýdany Jankent eldi mekeninde búgin oryn alǵan. Eldi meken eń jaqyn órt sóndirý bóliminen 32 shaqyrym qashyqtyqta oryn tepken.
«21 jeltoqsanda órt sóndirý qyzmetine Qazaly aýdany Jankent eldi mekenindegi barak tıptes jeke úıdegi páterdiń biri órtenip jatqany jóninde habar kelip tústi. Oqıǵa ornyna órt sóndirý qyzmetiniń 8 mamany men Qyzylorda oblystyq tótenshe jaǵdaılar departamentiniń órt sóndirýge arnaıy mamandandyrylǵan 2 tehnıkasy dereý attandy», - dep jazylǵan habarlamada.
Órt sóndirý qyzmeti mamandary oqıǵa ornyna jetkenshe turǵyn úıdiń shatyry tolyqtaı jaramsyz kúıge túsken. Jergilikti turǵyndar óz kúshterimen 4 balany qutqarǵan. Órt 15.01-de tolyqtaı sóndirildi.
Órt oqıǵasy saldarynan 55-jastaǵy er kisi men 2-jastaǵy bala kóz jumdy.
Sondaı-aq, Qyzylorda oblysynda mal izdeýge shyqqan eki adam kóligimen sýǵa ketkendigi budan buryn habarlanǵan bolatyn.
