Qyzylordadaǵy mektepte kınostýdııa ashyldy

Kınostýdııa №2 «Murager» mektebinde tusaýyn kesti. «Murager production» dep atalatyn stýdııa jastardyń shyǵarmashylyq qabiletin shyńdaýǵa kóńil bóledi. Sońǵy úlgidegi tehnologııamen jabdyqtalǵan stýdııa osylaısha talantty jastardy óner álemine baýlýǵa yqpal etedi.

«Bizde jas órender bul istiń qyr-syryna ábden qanyǵady. Áýeli stsenarıı jazý isimen aınalyssa, odan keıin akterlik sheberlik, rejısserlik pen akterlik ónerge den qoıady. Anımatsııalyq fılmder men áleýmettik rolık túsirý isin de nazarda ustaıtyn bolamyz», - dedi foto jáne kınostýdııanyń kórkemdik jetekshisi Jeńisbek Súıindikov.

Aldaǵy ýaqytta stýdııa basshylyǵy akterlerdi efırge daıyndaý isin meńgergen vızajıst mamandyǵy ıesin de jumysqa tartýǵa kóńil bólip otyrǵanyn jetkizdi. Oqýshylar arasynda bul kásiptiń qyr-syryn meńgergisi keletin órender de barshylyq.

«Búginde elimizde kınoındýstrııa isine qyzyǵýshylyq artyp keledi. Oǵan degen suranys ta zor. Otandyq kınoónimder kórermen tarapynan qyzyǵýshylyqty arttyryp keledi. Biz sol baǵytta qyzmet etetin jastar qataryn kóbeıtýdi maqsat etemiz», - dedi Jeńisbek Súıindikov.

Aldaǵy ýaqytta mektep oqýshylary kıno men foto isin úırenip, ózderiniń alǵashqy dúnıelerin jasaýǵa nıet bildirip otyr. Qazirdiń ózinde alǵashqy týyndylaryn jurtshylyqqa usynyp úlgerdi. Onda mekteptegi qyzyqty oqıǵalar barysy sýrettelgen. Qysqa metrajdy atalmysh fılm kópshilik tarapynan zor qoshemetke ıe boldy.

Aıta keteıik, №2 «Murager» mektebi - Qyzylorda oblysyndaǵy oqý oshaǵynyń biri. Byltyr Syr óńirinde «Úzdik bilim berý uıymy» baıqaýynda jeńimpaz atanyp, 17 mln teńgeniń sertıfıkatyn aldy.

Mektep ujymy atalmysh qarjyny osyndaı ıgi maqsattarǵa jumsaýdy josparlap otyr.