Qyzylordadaǵy mektepte 21 birinshi synyp ashyldy
QYZYLORDA. QazAqparat - Qyzylorda qalasyndaǵy №2 «Murager» mektep-gımnazııasynda bıylǵy jańa oqý jylynda 624 bala birinshi synyp tabaldyryǵyn attady, dep habarlaıdy QazAqparat tilshisi.
Bul mektep-gımnazııa Qyzylorda qalasyndaǵy halyq eń tyǵyz ornalasqan aýmaqta oryn tepken. Atalmysh aýmaqta Astana dańǵyly boıyndaǵy jáne «Saıahat» shaǵyn aýdanyndaǵy turǵyndardyń balalary bilim alady. Sondaı-aq, mektep-gımnazııada oblys ortalyǵynda turatyn ózge de daryndy balalar oqıdy.
«Osynyń nátıjesinde mektepte bıyl birinshi synyp boıynsha 21 synyp jasaqtalyp otyr. Byltyr bizde mundaı 18 synyp jıyntyǵy bolǵan edi. Jalpy, mektepte 3 800-ge jýyq oqýshy bilim alady», - dedi mektep dırektory Dınara Baımyrzaeva.
2018-2019 oqý jylynda Qyzylorda oblysynda 154 559 oqýshy, onyń ishinde 18 942-si birinshi synypqa bardy. Oblys boıynsha oqýshylar sanynyń jyl saıyn ósý dınamıkasy baıqalady. Byltyrǵymen salystyrǵanda ol 7 myńǵa kóbeıgen.
«Qyzylorda qalasynda da birinshi synypqa qabyldanǵan balalardyń sany artyp keledi. Bıyl 7 955 óren mektep tabaldyryǵyn attady», - dedi Qyzylorda qalalyq bilim bóliminiń baspasóz hatshysy Baqyt Bektibaıqyzy.
Ústimizdegi jyly oblystyq bilim berý salasy qyzmetkerleriniń dástúrli tamyz keńesinde №2 «Murager» mektep-gımnazııasy aımaqtyń úzdik mektebi retinde anyqtaldy.Osynyń nátıjesinde mektepke 17 mıllıon teńgeniń sertıfıkaty tabystaldy.
