Qyzylordadaǵy mektep qurylysynyń aınalasyndaǵy daý: Joba quny talapqa saı ma
QYZYLORDA. QazAqparat - Qyzylorda oblysy Jańaqorǵan kentinde salynyp jatqan №169 N.Ilıaletdınov atyndaǵy orta mekteptiń jańa ǵımaratynyń joba qunyna baılanysty áleýmettik jeli betterinde túrli pikirler aıtylǵan bolatyn. Osyǵan oraı quzyrly oryndar tarapynan júrgizilgen zertteý nátıjesi belgili boldy, dep habarlaıdy QazAqparat tilshisi.
Mektep 600 balaǵa arnalǵan. Onyń jobasyn daıyndaýǵa 2018 jyly aýdandyq bıýdjetten 14,8 mln teńge qarjy bólingen. Osyǵan sáıkes kent ákiminiń sheshimimen B.Baıkenjeev kóshesiniń boıynan mektep ǵımaratyn salýǵa jer ýchaskesi bólindi. Bul jer ınfraqurylymmen tolyq qamtylǵan, №169 N.Ilıaletdınov orta mektebiniń eski ǵımaratyna jaqyn ornalasqan. Mektep oqýshylarynyń qatynaýyna da qolaıly. Sondaı-aq, osy jerge shoǵyrlanǵan 8 myńnan astam turǵyn suranysyn qanaǵattandyrady.
«Mekteptiń jobalaý-smetalyq qujattary ótken jyly memlekettik saraptamanyń oń qorytyndysyna ıe boldy. Jobanyń jalpy quny 2,5 mlrd teńgeni quraıdy. Alaıda, onyń 2,4 mlrd teńgesi qurylys-montajdaý jumystaryna, 23 mln teńgesi avtorlyq qadaǵalaýǵa, sondaı-aq 63,5 mln teńgesi tehnıkalyq qadaǵalaýǵa qaralǵan. Osy jerde atap ótý kerek, Qazaqstan Respýblıkasynyń qurylys normalary jáne erejeleriniń qaǵıdalaryna sáıkes Jańaqorǵan kenti seısmıkalyq aımaqqa jatqyzylady. Sondyqtan ınjenerlik-geologııalyq izdestirý qorytyndysy negizinde mektep ǵımaraty 7 balǵa sáıkestendirildi. Nysannyń seısmıkalyq talaby eskerilgendikten onyń qurylys-montajdaý jumystaryna qosymsha 450 mln teńge eseptelgen. Sonymen qatar, jerasty sýlarynyń joǵary deńgeıde bolǵandyǵy da eskerildi. Jobalaý-smetalyq qujattamada 600 mln teńgege jýyq qarjy, jer jumystaryn qoldanystaǵy normatıvtik-tehnıkalyq talaptarǵa sáıkestendirý úshin qaralyp otyr. Joǵaryda atalǵan talaptar jobanyń qymbattaýyna ákep soqqanymen, balalar qaýipsizdigi bul jerde birinshi kezekke qoıylyp otyr», - dedi Qyzylorda oblysynyń qurylys, sáýlet jáne qala qurylysy basqarmasynyń basshysy Muhamedısa Álserikov.
Bilim ordasy ornalasqan aýmaqtyń geologııalyq zertteý qorytyndylaryna kúmán bolýyna oraı, Qyzylorda oblysynyń qurylys-sáýlet jáne qala qurylysy basqarmasy tarapynan ótken jyldyń qazan aıynda ınjenerlik-geologııalyq zertteý jumystaryna qaıta tapsyrys berilgen. Alaıda zertteý nátıjesi buryn berilgen geologııalyq zertteýlerdiń qorytyndysymen sáıkes kelip, esh qaýip joqtyǵy anyqtalǵan.
Basqarma basshysynyń aıtýynsha, ótken jyly atalǵan mektep qurylysynyń qurylys-montajdaý jumystaryn júrgizýge respýblıkalyq bıýdjetten 500 mln teńge qarjy bólindi. Memlekettik satyp alý konkýrsy jarııalanyp, qyrkúıek aıynda qurylys jumystary bastalǵan.
Búgingi kúni qurylysy qarqyndy júrip jatyr. Qurylys-montajdaý sapasy, «Nur Otan» partııasy oblystyq fılıaly men tıisti organdardyń qatań baqylaýynda.
