Qyzylordadaǵy qulaǵan jataqhana turǵyndaryn jeke kásipker qamqorlyǵyna aldy
QYZYLORDA. QazAqparat-Qyzylorda qalasyndaǵy qulaǵan jataqhana turǵyndaryn «Al Asad» JShS-niń dırektory Tóreǵalı Shankereı qamqorlyǵyna alyp, baspanaǵa kóshkenshe tamaqtandyryp, turmystyq qajetti zattarmen qamtamasyz etýde, dep habarlady QazAqparat tilshisi.
«Atalmysh jataqhana turǵyndary ýaqytsha bizdiń mektepke ornalastyryldy. Búginde 150-ge jýyq adamdy ýaqytsha turǵynjaımen qamtamasyz etip otyrmyz. Turǵyndar bizdiń beketke kelgen ýaqyttan bastap qyzylordalyq kásipker Tóreǵalı Qaryshuly azyq-túlik, turmysqa qajetti zattarmen qamtamasyz etýdi moınyna aldy. Tipti sábılerdiń jórgekterine deıin ólshemin suratyp, qamtamasyz etýde. Ýaqytsha qıyndyqqa kezikken azamattarǵa osylaısha qolushyn sozyp otyrǵan kásipkerge alǵystan basqa aıtarymyz joq», - dedi «Murager» mektebi dırektorynyń orynbasary Elmıra Azatbaeva.
Munan ózge, atalmysh mekteptegi № 6 «a» synyp oqýshylarynyń ata-analary jataqhana balalaryna arnaıy qoıylymdar uıymdastyryp, kóńilin kóterdi.
Aıta ketý kerek, 28 aqpanda jergilikti ýaqytpen saǵat 22.40-ta Tıtov turǵyn aýdany 16A mekenjaıy boıynsha ornalasqan jataqhananyń turǵyndar qonystanbaǵan bóligi qulady. Ǵımarattyń tórtinshi podezdiniń 1 jáne 5 qabaty aralyǵyndaǵy bóligi opyrylyp tústi. Zardap shekkender joq. Jataqhananyń ekinshi bóliginde turatyn 46 otbasy qaýipsiz jerge, «Murager» mektebindegi evakýatsııalyq beketke kóshirildi.
