Qyzylordadaǵy kooperatıvterdiń órisi keńeıýde
Kooperatıvterde barlyǵy 2872 múshe birigip, aýyl sharýashylyǵy salasynda jumystar jasaýda. Bul bastama QR Aýyl sharýashylyǵy mınıstri Asqar Myrzahmetovtiń tarapynan qoldaý tapty.
Máselen, óńirdiń ońtústigindegi eń shetki aýdany bolyp esepteletin Jańaqorǵan aýdanynda «Agrobıznes-2020» baǵdarlamasyn memlekettik qoldaý baǵytynda ónimderdi qaıta óńdeý jáne mal sharýashylyǵymen aınalysatyn 46 aýyl sharýashylyǵy óndiristik kooperatıvi qurylǵan. Olardyń arasynda 9 kooperatıv 266 jeke otbasylyq tulǵa mal sharýashylyǵymen, et, sút óndirý baǵytynda jumys júrgizedi. Aýyldyq okrýgterde jeke qosalqy sharýashylyqtardyń múmkinshiligine qaraı, aýyl sharýashylyǵy kooperatıvterine biriktirý negizinde jumystar jalǵastyrylý ústinde.
Jańaqorǵan kentine qarasty «Nurly-Jol birlestigi» jeke qosalqy tulǵalardan qurylǵan aýyl sharýashylyǵy óndiristik kooperatıvi 82 mln teńge nesıe alyp, mal bordaqylaý baǵytynda jumys jasaý ústinde.
Aýdan ortalyǵyna jaqyn ornalasqan Ózgent aýyldyq okrýginde de osy baǵytta ońdy nátıjeler óris alýda. Atap aıtqanda, «Aqbulaq-B» jeke aýyl sharýashylyǵy óndiristik kooperatıviniń 22 múshesi birigip, sút óndirý baǵytynda jumys júrgizýde. Sonymen qatar, sút qabyldaý tsehyn ashý baǵytynda da jumystar qolǵa alynǵan. Aýdannyń Kelintóbe, Súttiqudyq, Qojamberdi, Besaryq aýyldyq okrýgterinde irilengen kooperatıvter qurylyp, olardyń quramyna jeke otbasylyq tulǵalar tartyldy. Ondaǵy sharýashylyqtar da atalǵan baǵytta óz isterin ashyp, odan ári óristetetin bolady.
Jańaqorǵan aýdanynyń ákimi Ǵalym Ámireevtiń basshylyǵymen alǵashqy kezekte aýdandaǵy árbir aýyldyń áleýetin zerdeleý jumystary júıeli júrgizildi.
Aýyl sharýashylyǵy kooperatsııasyn damytý barysyndaǵy ekinshi qolǵa alynǵan jumys Aqqorǵan aýyldyq okrýgine qarasty «Sádir-Ata» aýyl sharýashylyǵy óndiristik kooperatıviniń 24 múshesi 46,1 mln teńge nesıe alyp, búginde olar mal bordaqylaý baǵytynda jumys jasaýda. Ujym músheleriniń jeke qosalqy tulǵalardan qurylǵandyǵyn eskersek, munda da ózara básekelestik artatyndyǵy sózsiz. Bul mal bordaqylaý jumysynyń sapaly da paıdaly bolýyna negiz qalaıdy.
Memlekettik «50 aýyl» baǵdarlamasy aıasynda pılottyq joba tańdalyp, sol baǵdarlama arqyly osy eldi mekendegi 65 jeke otbasylyq sharýashylyq múshesiniń 59 múshesi «Mııaly» aýyl sharýashylyǵy kooperatıvine birikti.
Olarǵa 172,9 mln teńge nesıege 617 bas múıizdi iri qara, 110 bas jylqy alynyp, bordaqylaý jumystary aılar boıy toqtaýsyz júrgizildi. Sonymen qatar, 1 modýldi mal soıý pýnktin alý baǵytynda da jumys qolǵa alynǵan.
Bul jerde toqtalyp óter jaıt, Memleket basshysy óziniń Ult jospary - bes ınstıtýtsıonaldyq reformany júzege asyrý jónindegi 100 naqty qadam eńbeginde alda atqarylýy tıis mindetterdi naqtylap bergen bolatyn. Ondaǵy 54-qadamda: Kásipkerlerdiń múddelerin qorǵaý úshin bıznes-ombýdsmen ınstıtýtyn nyǵaıtý máselesi kóterildi. Jańa ınstıtýttyń quramyna bıznestiń jáne Ulttyq kásipkerler palatasynyń ókilderi kiretindigi naqty kórsetildi.
Sondaı-aq, 55-qadamda: Qazaqstannyń álemdik naryqqa shyǵýy jáne eksport taýarlary úshin óńdeý ónerkásibine transulttyq kompanııalardy tartý mindeti qoıyldy. Búgingideı kooperatıvterge birigý Elbasy júktegen mindetterdi atqarýdyń alǵysharty.
