Qyzylordadaǵy gaz jarylysy: Kóz jumǵan 4 adamnyń kimder ekeni belgili boldy
QYZYLORDA. QazAqparat - Qyzylorda oblysy Qarmaqshy aýdanynda jeke turǵyn úıde gaz jarylýy saldarynan qaza bolǵan turǵyndardyń kimder ekeni belgili boldy, dep habarlaıdy QazAqparat tilshisi.
Budan buryn habarlaǵanymyzdaı, búgin, 15 naýryzda saǵat 13:30-da Josaly kentindegi bir qabatty jeke turǵyn úıde kólemi 27 lıtr gaz ballony jarylyp, úı qırady.
Oblystyq tótenshe jaǵdaılar departamenti mamandarynyń kúshimen úıindi astynan 4 adamnyń máıiti tabyldy. Olardyń bireýi - 1981 jyly dúnıege kelgen úı ıesi. Sondaı-aq, úı ıesiniń 2000 jylǵy sińlisi men 1999 jylǵy týysy, 2001 jylǵy kórshisi oqıǵa ornynda kóz jumǵan.
«Órt sóndirý mamandary kelgenge deıin kórshiler úıden 1950 jylǵy kórshisin shyǵaryp, aýrýhanaǵa jetkizgen. Órt 15:17-de tolyq sóndirildi. Órt alańy 144 sharshy metrdi qurady. Al qulaý alańy 46 sharshy metr.
Saǵat 17:05-te úıdiń qulaǵan qurylymdaryn taldaý jumystary aıaqtaldy. Órt bolǵan jerge tekserý júrgizilýde. Oqıǵanyń sebebi anyqtalýda. Oqıǵa ornyna Qyzylorda qalasynan órt synaq zerthanasy keldi», - dep málim etti Qyzylorda oblystyq tótenshe jaǵdaılar departamentinen.
