Qyzylordadaǵy festıvalge 10 memleketten ónerpazdar keldi
Bıylǵy jyldyń ereksheligi gala-kontsert Qarmaqshy aýdanyndaǵy Qorqyt ata memorıaldy eskertkish-kesheniniń amfıteatrynda ótedi. Onda Qazaq Ulttyq Óner ýnıversıtetiniń rektory Aıman Musahodjaeva qobyz ben skrıpkanyń súıemeldeýimen Qorqyttyń kúılerin oryndaıdy. Bul týraly búgin Óńirlik kommýnıkatsııalar qyzmetinde túrki tildes elderdiń «Qorqyt jáne Uly Dala sazy» atty dástúrli folklorlyq mýzykalyq óner festıvaliniń ashylý qarsańynda ótken baspasóz konferentsııasynda málim boldy.
Festıvaldiń meımandary memlekettik rámizder alleıasynda, oblystyq tarıhı-ólketaný murajaıynda bolyp, qalanyń kórikti jerlerin aralap kórdi. Iran Ǵaıyptyń «Qorqyttyń kóri» spektaklin tamashalady. Erteń «Qorqyt ata murasy: epıkalyq mádenıet, halyq ańyz áńgimeleri jáne áýenderi» atty halyqaralyq ǵylymı-teorııalyq konferentsııasyna qatysady.
«Osymen 4-shi ret Elasynyń qoldaýymen Qyzylorda oblysy ákimdigi jáne Halyqaralyq «TÚRKSOI» uıymymen birlesken folklorlyq mýzykalyq óner festıvali uıymdastyrylýda. Qarmaqshy aýdanyndaǵy Qorqyt Ata memorıaldy kesheninde gala-kontsertpen qorytyndylanady», - dedi oblystyq mádenıet, arhıvter jáne qujattama basqarmasynyń basshysy Erjan Ábdrahmanov.
Túrkııa elinen kelgen Hadjettepe ýnıversıtetiniń professory Ozkýl Chobanogly Qorqyt týraly pán engizýdi usyndy.
«Qorqyt týraly bolashaq urpaq tanýy kerek. Barlyq túrki elder memleketterdiń bilim júıesine Qorqyt týraly pán engizilse degen usynysymyz bar. Sonymen qatar, Uly oıshyl týraly tolyq zertteý júrgize almasaq, onda biz úshin óz-ózimizge mazar qazǵandaı bolamyz», - dep oıyn bildirdi.
Óz kezinde Qazaq Ulttyq óner ýnıversıtetiniń «Qorqyt ata murasyn zertteý zerthanasynyń» meńgerýshisi Qazaqbaı Dotauly: «Qobyz aspabyn - Qorqyttan bólip tastaı almaımyz. Babanyń kúıleri tek qazaq ultynda saqtalǵan. Sondaı-aq, terimen qaptalǵan, jylqynyń qylymen tartylǵan, qońyr úndi qobyz tek bizde ǵana, - dedi.
Belgili jyraý Almas Almatov óńirdegi mańyzdy sharaǵa qatysty óz oıyn bildirdi.
«Festıval túrki baýyrlastardyń ónerin baǵalaý, olardyń álemin, mádenıetin tanýdyń birden-bir - ǵylymı trıbýnasy. Túrki halqyna ortaq mádenıet pen mýzyka arqyly álemdik mádenıettiń bıigine shyǵamyz. Sondyqtan da, konferentsııanyń aldyna qoıyp otyrǵan salmaǵy zor. Bul ónerdiń uly birlestigine jol ashý degen sóz».
Baǵdarlama barysynda folklortanýshy ǵalymdar stýdentterge sheberlik dáristerin ótkizedi. Sonymen qatar, olar Qarmaqshy aýdanyndaǵy etnoaýyldyń qonaǵy bolady.
