Qyzylordadaǵy eki kópqabatty úıde gaz jarylǵan
ASTANA. QazAqparat - Qyzylordada birden eki kópqabatty úıde gaz jarylyp, 24 jastaǵy boıjetkendi kúıik shaldy, dep habarlaıdy Habar 24.
Qutqarýshylarǵa alǵashqy habarlama Taımanov kóshesindegi №1 úı turǵyndarynan túsken. Ondaǵy jarylystyń kúshti bolǵany sonshalyq, tómengi qabattaǵy páter balkonynyń saý-tamtyǵy qalmaǵan.
Araǵa bireshe mınýt salyp, osy kóshedegi №3 úıden ekinshi jarylys daýsy estilgen. 15-páterde jarylystan keıin órt shyqqan. Sonyń saldarynan 24 jastaǵy qyzdy kúıik shaldy. Kýágerlerdiń aıtýynsha, qalanyń birneshe shaǵyn aýdanyndaǵy páterlerden tústen keıin gaz aqaýy baıqalǵan. Avarııalyq kezekshi bólimder qońyraý shalǵan turǵyndarǵa gaz qondyrǵylaryn óshirýge keńes beripti.
«Saǵat 2 jarym shamasynda teledıdar kórip otyr edik, úıde 92 jastaǵy anam jáne qyzym boldy. Qatty shýyldaǵan daýys estip, qyzym gazǵa shaı qoıdy dep oıladym. Baryp qarasam, ólsheýish qurylǵyǵa gaz qubyry jalǵanǵan jer qatty shýyldap jatyr eken. Gazdyń eń kishkentaı kózin jaǵyp kórip edim, qatty lapyldap janyp tur eken. Dereý gazdy japtym, jaryqty óshirdim de, kórshilerdiń esigin uryp jatqanymda birdeńe «gúrs» ete qaldy. Qarasam, balkon jarylyp, perdesi órtenip jatyr», - dedi Qyzylorda qalasynyń turǵyny Gúlnár Arǵynbaeva.
Eske salaıyq, keshe Qyzylorda qalasynyń irgesindegi Abaı eldi mekeninde ornalasqan AGRS-2 avtomattandyrylǵan gaz rettegishinde apatty jaǵdaı oryn alǵan edi. Oryn alǵan oqıǵaǵa oraı qala turǵyndaryna gaz qondyrǵylaryn ajyratý týraly eskertý berilgen bolatyn.
