Qyzylordadaǵy balalardyń ólimi: Qylmystyq is qozǵaldy
QYZYLORDA. QazAqparat - Qyzylorda qalasyndaǵy «Naýryz» saıajaı ýchaskesindegi jeke turǵyn úıden shyqqan órtke qatysty jańa derekter belgili boldy, dep habarlaıdy QazAqparat tilshisi.
Qyzylorda oblystyq densaýlyq saqtaý basqarmasynyń bólim basshysy Raýshan Baqtyberlınanyń aıtýynsha, atalǵan órt oqıǵasy barysynda taǵy da eki adam jaraqat alǵan. Órtten balalardy qutqarýǵa kómekke kelgen er azamat oblystyq medıtsına ortalyǵynyń terapııa bóliminde em alǵannan keıin, úıine qaıtaryldy. Al ekinshi adam medıtsına ortalyǵynda emdelýde.
«Osy bolǵan jaǵdaıǵa baılanysty qylmystyq is qozǵaldy. Bul is boıynsha arnaıy saraptama taǵaıyndaldy», - dedi Qyzylorda oblystyq polıtsııa departamentiniń anyqtaý basqarmasy bastyǵynyń orynbasary Nazarbek Jamaladdın.
Qyzylorda oblystyq tótenshe jaǵdaılar departamentiniń málimetine súıensek, órt oqıǵasy kezinde esiktiń ishten ilinip turǵany anyqtaldy. Sonyń saldarynan órt oqıǵasy kezinde ishte qalyp qoıǵan balalar tereze arqyly syrtqa shyǵarylǵan.
«Balalar syrtqa shyǵarylǵanymen olardyń ómirin saqtap qalý múmkin bolǵan joq. Eki bala oqıǵa ornynda qaza bolsa, bireýi jedel járdem kóligimen alyp bara jatqan sátte kóz jumdy», - dedi Qyzylorda oblysynyń tótenshe jaǵdaılar departamenti bastyǵynyń orynbasary Asqar Tóleshov.
Eske salsaq, 9 qańtarda Qyzylordada turǵyn úıden shyqqan órtte tútinge ýlanǵan 2011, 2012, 2014 jyldary dúnıege kelgen úsh bala qaza bolǵany týraly habarlaǵan bolatynbyz.
Jalpy bıylǵy jyl basynan beri oblysta 15 órt oqıǵasy tirkelgen. Al keshegi óńirdegi órt adam ólimi tirkelgen alǵashqy oqıǵa bolyp otyr. Byltyr osyndaı órt oqıǵalary saldarynan 14 adam kóz jumsa, olardyń 1-i bala bolǵan.
