Qyzylordadaǵy atystan jaraqat alǵan azamatqa ota jasalyp jatyr
QYZYLORDA. QazAqparat - Búgin Qyzylorda qalasynda bolǵan atysta oq jaraqatyn alǵan azamatqa oblystyq Medıtsına ortalyǵynda ota jasalýda. Bul jóninde óńirlik kommýnıkatsııalar qyzmetinde ótken baspasóz máslıhatynda oblystyq Medıtsına ortalyǵy dırektorynyń mindetin atqarýshy Qanat Júndabekov málim etti, dep habarlaıdy QazAqparat tilshisi.
Jaraqat alǵan azamat ortalyqtyń jansaqtaý bólimine jatqyzylǵan.
«Naýqas oblystyq medıtsına ortalyǵyna aýyr jaǵdaıda jetkizildi. Dereý qabyldaý bóliminen jansaqtaý bólimine aýystyryldy. Sol mezette oǵan «ish qýysyna tereń oq tıgen, ishki aǵzalary zaqymdalǵan» degen dıagnoz qoıyldy. Dál qazirgi kezde naýqasqa ota jasalyp jatyr. Onyń jaǵdaıy keıin belgili bolady«», - dedi OMO dırektorynyń mindetin atqarýshy Qanat Júndabekov.
Sondaı-aq, oblystyq ishki ister departamenti bastyǵynyń orynbasary Nurlan Anarbaevtyń aıtýynsha, tapa-tal tústegi atys oqıǵasyna 7-8 adam qatysqan.
«Qalalyq ishki ister basqarmasynyń kezekshi bólimine Áıteke bı jáne Jeltoqsan kósheleriniń qıylysynda buzaqylyq bolǵany týraly habarlama túsken. Oqıǵa ornyna jedel-tergeý toby jetip, 7-8 adamnan quralǵan toptyń buzaqy áreketi anyqtaldy. Nátıjesinde qalanyń 1 turǵyny oq jaraqatymen oblystyq medıtsınalyq ortalyqqa (OMO) jetkizildi.
Atalmysh derek boıynsha QR QK 259-baby, 3-bóligi, buzaqylyq deregi boıynsha qylmystyq is qozǵaldy. Qazirgi tańda kúdiktiler, buzaqylyq árekettiń músheleri qalalyq ishki ister basqarmasyna jetkizildi, tergeý amaldary júrgizilýde. Tergeý múddesine baılanysty málimetter jarııa etilmeıdi», - dedi N.Anarbaev.
Aıta keteıik, osyǵan deıin Qyzylorda qalasynyń ortalyq kósheleriniń birinde atys bolǵany jáne oqıǵanyń beınetúsirilimi jelige jarııalanǵandyǵy habarlandy.
Artynan jýrnalıstermen jedel baspasóz máslıhatyn ótkizgen tártip saqshylary oqıǵanyń bolǵanyn rastap, onyń saldarynan bir azamattyń aýyr jaraqat alǵanyn aıtty.
