Qyzylordadaǵy atysqa baılanysty úsh kúdikti qamaldy
QYZYLORDA. QazAqparat - Qyzylorda qalasynda jastar arasynda bolǵan atys oqıǵasyna baılanysty 3 kúdikti ustalyp, ýaqytsha ustaý abaqtysyna qamaldy, dep habarlaıdy QazAqparat tilshisi.
Qyzylorda oblystyq ІІD baspasóz qyzmeti taratqan habarlamada kúdiktiler óz kinálaryn moıyndap, jaýap bergeni aıtylǵan. Oqıǵaǵa baılanysty QR Qylmystyq kodeksiniń 293-baby 2, 3-bóligimen (buzaqylyq) jáne 99-babynyń 2-bóligimen (adam óltirý) sotqa deıingi tergeý júrgizilýde.
Eske salaıyq, 27 naýryz kúni saǵat 14.50 shamasynda Qyzylorda qalasynyń Áıteke bı jáne Jeltoqsan kósheleriniń qıylysynda atys boldy. Áleýmettik jelide kóshedegi adamdar túsirgen vıdeo tarady. Oqıǵa ornyna jetken qalalyq Іshki ister basqarmasynyń jedel-tergeý toby 7-8 adamnan quralǵan toptyń buzaqy áreketin anyqtady. Bir adam oq jaraqatymen oblystyq Medıtsınalyq ortalyqqa jetkizilip, ol otadan keıin kóz jumǵan edi.
Ádilet QAŃTARBAEV
Foto: lezgigazet.ru
