Qyzylordada «Jyr dúldúli - Erimbet» atty jyr-termeshiler baıqaýy ótti
QYZYLORDA. QazAqparat - Syr eli - jyr eli. Jyrdyń mekeni - Qazaly óńiriniń óner álemine kelip, jyrsúıer jurtshylyqty tánti etken shaıyr Qarasaqal Erimbettiń 170 jyldyǵy qurmetine Áıteke bı kenttik klýbynyń uıymdastyrýymen «Jyr dúldúli - Erimbet» atty aýdandyq jyrshy-termeshiler baıqaýy ótkizildi. Bul týraly Qazaly aýdandyq ákimdiginiń baspasóz qyzmeti habarlady.
Jyr dodasyna qatysqan talapkerler Qarasaqal Erimbettiń jyr-dastandarynan úzindi jáne terme-tolǵaýlarynyń maqam-sazyn buzbaı óz naqyshynda oryndady. Baıqaýǵa tórelik jasaǵan qazylar alqysynyń quramynda Baınazar Ótepov atyndaǵy jyrshy-termeshiler mektebiniń jetekshisi Jastalap Ońdabaev, halyqaralyq jyrshy-termeshiler baıqaýynyń júldegeri Aqerke Ótepbergenova, aýdandyq mádenıet jáne tilderdi damytý bóliminiń mamany Bekzat Qazıqyzy boldy.
Qorytyndysynda júldeli І oryndy Qorqyt Ata atyndaǵy Qyzylorda memlekettik ýnıversıtetiniń stýdenti, Bekarystan bı aýlynan qatysqan Qýanysh Alǵazıev jeńip alsa, ІІ oryndy aýdandyq mádenıet ortalyǵynyń qyzmetkeri, Áıteke bı kentinen qatysqan Jánibek Qutmahanov ıelendi, ІІІ oryndy Qazaly qalasynan qatysqan Edige Aıdarov jáne Jalańtós batyr aýlynan qatysqan Meıirimjan Mahambetjanov qanjyǵalady. Júldegerler arnaıy dıplomdarmen jáne baǵaly syılyqtarmen marapattaldy, bir top jyrshy-termeshiler yntalandyrý syılyqtaryna men marapattaldy.
