Qyzylordada jylý berý maýsymy bastaldy
QYZYLORDA. QazAqparat - Qyzylorda oblysy men qalasynda jylý berý maýsymy bastaldy, dep habarlaıdy QazAqparat tilshisi.
«Qaladaǵy 1166 áleýmettik nysan jylýmen qamtamasyz etildi. 692 kópqabatty turǵyn úıdiń 636-sy jylytý júıesine qosyldy. Sondaı-aq, qalǵan 56 turǵyn úıdi jylýǵa qosý jalǵasýda. Oblys aýdandarynda jylý berý 12-15 qazanda bastalǵan bolatyn», - dedi oblystyq Energetıka jáne kommýnaldyq sharýashylyq basqarmasynyń basshysy Medet Ýsaın.
Jylý maýsymyna daıyndyq jumystary aǵymdaǵy jyldyń sáýir aıynda qolǵa alyndy. Sol ýaqyttan bastap jóndeý men qysqy maýsymǵa kómir satyp alý bastaldy.
«Oblystyq bıýdjetten 250 mln teńge, kásiporynnyń esebinen - 204 mln teńge bólinip, jylý berý qazandyqtary jóndeldi», - dedi Qyzylorda jylý-elektor ortalyǵynyń basshysy Rýslan Nurmaǵanbetov.
Oblys ákimi Qyrymbek Kósherbaev qala, aýdan ákimderine áleýmettik nysandar men turǵyn úılerge úzdiksiz jáne joǵary sapaly jylý, elektrmen qamtamasyz etýde jaýapkershilik tanytyp, kómir satý pýnktteri boıynsha monıtorıng jasap, jetkizý kestesin jáne otyn baǵasyn qadaǵalaý jumysyn mindettegen edi.
