Qyzylordada jylý ádettegiden bes kúnge erte beriledi
QYZYLORDA. QazAqparat - Qyzylorda qalasynda bıyl jylý bes kúnge erte beriledi, dep habarlaıdy QazAqparat tilshisi.
Jylda jylý berý maýsymy arnaıy erejege sáıkes bes táýlik boıy syrtqy aýanyń ortasha temperatýrasy +8°S jáne odan tómen bolǵan jaǵdaıda bastalý qajet. Búginge deıin ol 15 qazanǵa belgilenip júrdi.
«Bıyl qalada aýa temperatýrasy kúrt tómendep ketti. Osyǵan baılanysty qala ákiminiń 1 qazandaǵy sheshimi negizinde jylý 10 qazannan bastap beriledi. Qazir qalada jylý berý, oǵan kóp qabatty turǵyn úıler men ınjenerlik júıelerdiń daıyndyǵy basty nazarda» - dedi qala ákiminiń orynbasary Elmurat Rahmatýllaev.
Mamandar oblys ortalyǵyndaǵy barlyq nysan jylý maýsymyna qosylýǵa tolyq daıyn ekenin aıtady.
«Endigi kezekte turǵyndar úıishilik jylytý júıesine nazar aýdarýy qajet. Avarııalyq jaǵdaı týyndaǵan jaǵdaıda tıisti mekemelerge nemese óz aýmaǵy boıynsha basqarý oryndaryna habarlasýy tıis», - dedi qalalyq turǵyn úı kommýnaldyq sharýashylyq jolaýshylar kóligi, avtomobıl joldary jáne turǵyn úı ınspektsııasy bóliminiń basshysy Birjan Dalabaev.
Bıyl jylý berý maýsymy kezeńinde Qyzylorda qalasyna qajetti qatty otyn kólemi shamamen 37 myń tonnany quraıdy. Turǵyndarǵa qajetti kómir qory tolyq jetkilikti. Jylý berý maýsymyna daıyndyq jumystaryn júrgizýge «Jumyspen qamtý jol kartasy», «Nurly jer» baǵdarlamalary boıynsha jáne oblystyq, jergilikti bıýdjetten qarjy qaralǵan.
Aıta keteıik, oblys ortalyǵynda barlyǵy 815 kóp qabatty turǵyn úı bar. Onyń 757-i ortalyqtandyrylǵan jylý júıesine qosylǵan, 58-i jeke jylý kózderimen jylytylady.
Sondaı-aq, bir top qyzylordalyq «Halyq alǵysy» medalimen marapattaldy https://kaz.inform.kz/news/bir-top-kyzylordalyk-halyk-algysy-medalimen-marapattaldy_a3704079.
