Qyzylordada jylqylardyń qyrylýyna baılanysty mamandar túsinik berdi
JAŃAQORǴAN. QazAqparat - Qyzylorda oblysy Jańaqorǵan aýdanynda jylqylardyń qyrylýyna baılanysty tıisti sala mamandary túsinik berdi, dep habarlaıdy QazAqparat tilshisi.
Atalǵan derek alǵash 14 tamyzda tirkelgen. Odan keıin aýdandaǵy Baıkenje, Qojakent, Ózgent, Mashbek Nálibaev aýyldarynda jylqy maly belgisiz sebeptermen aýyrǵan. Olardyń keıbiri ólim-jitimge ushyraǵan.
«Jergilikti veterınarııalyq dárigerler aýrý oshaǵynda boldy. Aýyryp turǵan jylqylardyń klınıkalyq belgileri naqtylandy. Ólgen jylqylardyń basyn teksergende gastrofılez qurttary bar ekendigi belgili boldy. Keıbir BAQ-da aıtylǵan 200 bas jylqynyń ólgendigi anyqtalǵan joq. Jalpy, aýdanda 94 bas jylqy atalǵan aýrýǵa shaldyqqan. Jergilikti veterınarııalyq dárigerler 29 jylqynyń ólgenin naqtylady. Qalǵanyn veterınar dárigerler emdep jazyp shyqty», - dedi oblystyq veterınarııa basqarmasynyń basshysy Ersultan Ápetov.
Onyń aıtýynsha, bul parazıtarlyq aýrýlarǵa jatady. Oǵan qarsy is-sharalar mal ıesiniń óz qarajaty esebinen júrgizilýi tıis.
«Jylqy gastrofılezi aýrý QR Aýyl sharýashylyǵy mınıstriniń 2014 jylǵy 30 qazandaǵy buıryǵymen bekitilgen «Janýarlardyń jáne adamnyń densaýlyǵyna qaýip tóndiretin janýarlardy, janýarlarlan alynatyn ónimder men shıkizatty mindetti túrde alyp qoıý jáne joıý júrgiziletin kezdegi janýarlardyń asa qaýipti aýrýlar tizbesine» engizilmegen. Sondyqtan mal ıelerine ótemaqy qarastyrylmaıdy. Taǵy bir aıta keterligi, mal ıeleri jylqysy aýyryp turǵandyǵy jóninde veterınarııalyq dárigerlerge ýaqytyly habarlamaǵan. Bul aýrý bógelek qurttarynan paıda bolady. Sondyqtan onyń aldyn alý sharalary júrgizilýi tıis. Olaı bolmaǵan jaǵdaıda bógelek qurttary jylqy aǵzasynda eresek qurttarǵa aınalady. Emdik sharalardy júrgizý tıimsiz bolady. Onyń sońy ólim-jitimge soqtyrady», - dedi E.Ápetov.
