Qyzylordada jyl úzdikteri marapattaldy
QYZYLORDA. QazAqparat - Qyzylordada óńirdiń damýyna erekshe qyzmet etip, elge eńbegimen tanylǵan 12 azamatqa «Qalanyń qurmetti azamaty» ataǵy berildi. Bul Qyzylorda qalasynyń ákimi Nurlybek Nálibaevtyń jyldy qorytyndylaý jáne úzdikterdi marapattaý saltanatty sharasykezinde jarııa etildi, dep habarlady QazAqparat HAA tilshisi.
Saltanatty sharada qala ákimi jyl kóleminde óńirimizdiń jetken jetistikterine toqtalyp, barsha qala turǵyndaryn Jańa jyl merekesimen quttyqtady.
- Ótip bara jatqan jyl bizdiń qalamyz úshin de shyn máninde birlik pen berekeniń, jańa jetistikter men múmkindikterdiń, halyq qalaǵan, serpindi jobalardyń oryndalýymen asa qundy jyl boldy.
Ár jańa jyl tabaldyryǵynda jaqsylyq pen jaǵymdy jańalyq kútemiz. Endeshe keler jyly sol oıymyzdaǵy arman-tilegimiz júzege asyp, baq-berekemiz tası bersin. Elimizdi órkendetý jolyndaǵy eńbekterińizge mol tabys, denderińizge saýlyq, shańyraqtaryńyzǵa qut - bereke tileımin! - dedi qala ákimi.
Shara barysynda, óńirimizdiń damýyna erekshe qyzmet etip, elge eńbegimen tanylǵan 12 azamatqa «Qalanyń qurmetti azamaty» ataǵy tapsyryldy.
Sonymen qatar, jyl boıyna halyqqa qyzmet etý jolynda jarqyn jetistikke jetken ár túrli saladan 14 azamat «Jyl úzdikteri» nomınatsııasymen marapattaldy.
Bilim berý salasynda úzdik nátıjelerge qol jetkizgen, qala mektepteriniń 10 ustazyna, qala ákiminiń «Úzdik muǵalim» grant ıelerine taǵaıyndalǵan 150 myń teńge syıaqysy, óz salasynda jetistik belesteriniń alǵashqy satysyn baǵyndyryp, óńirimizdiń damýyna óz úlesterin qosyp júrgen 10 jasqa qala ákiminiń «Samǵaý» jastar syılyǵy jáne 100 myń teńge syıaqy tapsyryldy. Belgili ǵalym, fızıka - matematıka ǵylymdarynyń doktory, professor, Qazaqstannyń Ulttyq ǵylym akademııasynyń akademıgi Asqar Jumadildaev júldesi úshin matematıka páninen qalamyzdaǵy mektep oqýshylary arasynda ótkizilgen olımpıada baıqaýynyń jeńimpazdary 10 oqýshyǵa qala ákiminiń arnaıy 100 myń teńge syıaqysy berildi.
Saltanatty shara merekelik kontsertpen jalǵasyp, QR Eńbek sińirgen ártisi, Qyzylorda qalasynyń «Qurmetti azamaty» Qarakóz Aqdáýletovanyń shákirtteri Samal Baıseıitova, Maqsat Maqulbekov, estrada juldyzy Nurjan Kermenbaev jáne jergilikti ónerpazdar qatysýshylarǵa merekelik kóńil-kúı syılady.
