Qyzylordada jyl qorytyndysy boıynsha birqatar azamattar marapattaldy
QYZYLORDA. QazAqparat - Qyzylordadaǵy A.Toqmaǵambetov atyndaǵy qalalyq mádenıet úıinde, qala ákimi N.Nálibaevtyń qatysýymen 2017 jyldyń qorytyndysymen úzdikterdi marapattaý saltanatty sharasy ótti, dep habarlady QazAqparat tilshisi.
Saltanatty sharada qala ákimi jyl kóleminde óńirimizdiń jetken jetistikteri men atqarylǵan aýqymdy jobalarǵa toqtalyp, barsha qala turǵyndaryn sanaýly kúnderden keıin tórimizge enetin Jańa jyl merekesimen quttyqtady.
«Ótip bara jatqan jyl bizdiń óńirimiz úshin de shyn máninde birlik pen berekeniń, jańa jetistikter men múmkindikterdiń, halyq qalaǵan serpindi jobalardyń oryndalýymen asa qundy jyl boldy. Ár jańa jyl qarsańynda ómirden jaqsylyq pen jaǵymdy jańalyq kútemiz. Endeshe keler jyly sol oıymyzdaǵy arman-tilegimiz júzege asyp, baq-berekemiz tası bersin. Jańa 2018 jyl ár otbasyna baq-bereke syılap, elimizge mol jaqsylyǵy men ıgiligin ala kelsin!» - dedi qala ákimi.
Shara barysynda, Elbasy Jarlyǵymen 11 batyr ana «Altyn alqa» memlekettik nagradasymen marapattaldy jáne óńirimizdiń damýyna erekshe qyzmet etip, elge eńbegimen tanylǵan 11 azamatqa «Qalanyń Qurmetti azamaty» ataǵy berildi.
Sonymen qatar, jyl boıyna halyqqa qyzmet etý jolynda jarqyn jetistikke jetken ártúrli saladan 17 azamat «Jyl úzdigi - 2017» nomınatsııasymen marapattaldy.
Bilim berý salasynda úzdik nátıjelerge qol jetkizgen, qala mektepteriniń 10 ustazyna qala ákiminiń «Úzdik muǵalim» grant ıelerine taǵaıyndalǵan 150 myń teńge syıaqysy, óz salasynda jetistik belesteriniń alǵashqy satysyn baǵyndyryp, óńirimizdiń damýyna óz úlesterin qosyp júrgen 10 jasqa qala ákiminiń «Samǵaý» jastar syılyǵy jáne 100 myń teńge syıaqysy tabystaldy.
Saltanatty shara merekelik kontsertke ulasyp, jergilikti ónerpazdar saltanatty sharaǵa qatysýshylarǵa merekelik kóńil-kúı syılady.
