Qyzylordada jyl basynan beri 2105 adam koronavırýs juqtyrdy
QYZYLORDA. QazAqparat - Qyzylorda oblysynda jyl basynan beri 2105 adam koronavırýs juqtyrdy, dep habarlaıdy QazAqparat tilshisi.
Bıyl óńirde 2105 adam koronavırýs juqtyrdy. Olardyń 1240-i Qyzylorda qalasynda tursa, aýdandar boıynsha Aralda - 75, Qazalyda -150, Qarmaqshyda - 94, Jalaǵashta - 78, Syrdarııada -154, Shıelide - 133, Jańaqorǵanda - 190 adam qaterli indetke shaldyqty.
Byltyrdan beri Qyzylorda oblysynda 5497 adam koronavırýs juqtyrǵan. Olardyń 3308-i Qyzylorda qalasynyń turǵyny bolsa, qalǵany aýdandar úlesine tıedi.
Óńirde ótken jyldan beri koronavırýs ınfektsııasynan 16 adam kóz jumdy. Olardyń 9-y oblys ortalyǵynda turǵan. Sondaı-aq, Jalaǵashta - 2, Syrdarııada - 1, Shıelide - 1, Jańaqorǵan - 3 adam qaterli indet saldarynan ómirden ótti.
«Ótken táýlikte oblysta koronavırýs ınfektsııasymen 70 jaǵdaı tirkeldi. Naýqastardyń 33-i oblys ortalyǵynda turady. Al Aralda - 1, Qazalyda - 4, Qarmaqshyda -10, Jalaǵashta - 2, Syrdarııada - 5, Shıelide - 7, Jańaqorǵanda - 8 adam qaterli indet qursaýyna tústi. Naýqastar oblystyq juqpaly aýrýlar, kópbeıindi oblystyq, kópbeıindi qalalyq jáne aýdandyq aýrýhanalarda em qabyldaýda. Al, 46-sy úı jaǵdaıynda baqylaýǵa alynǵan», - dep málim etti Qyzylorda oblystyq densaýlyq saqtaý basqarmasynan.
Aıta ketelik, Qyzylorda oblysynda vaktsınatsııa pýnkteri aptasyna 7 kún jumys isteıdi.
