Qyzylordada jurtty dúrliktirgen bala urlaý oqıǵasy rastalǵan joq

QYZYLORDA. QazAqparat - Qyzylorda oblysynda halyqty dúrliktirgen bala urlaý jáne bala urlaýǵa áreket jasaý deregi rastalǵan joq, dep habarlaıdy QazAqparat tilshisi.

Áleýmettik jeli betterinde Qyzylorda qalasynda bala urlaý deregi oryn alǵany jaıynda qaýeset taraǵan bolatyn. Qyzylorda oblysy polıtsııa departamenti munyń negizsiz ekenin jarııa etti.

«Bul derek shyndyqqa saı kelmeıdi. Qyzylorda oblysy aýmaǵynda bala urlaý jáne bala urlaýǵa áreket jasaý deregi tirkelgen joq. Qyzylorda oblysynyń polıtsııa departamenti QR Qylmystyq kodeksiniń 274-babynda jalǵan aqparat taratý boıynsha qylmystyq jaýapkershilik qaralǵanyn eskertedi», - dep málim etti Qyzylorda oblystyq polıtsııa departamenti.

Budan buryn Qyzylorda qalasyndaǵy kóp qabatty úılerdiń birinde jasóspirimniń sómkesin tartyp almaq bolǵan áıel qolǵa túskenin habarlaǵan edik .