Qyzylordada júrgizýshi eki adamdy qaǵyp, oqıǵa ornynan izin sýytqan
QYZYLORDA. QazAqparat - Qyzylordada jaıaý júrginshiler jolynda eki adamdy qaǵyp, oqıǵa ornynan qashyp ketken kólik júrgizýshisi ustaldy, dep habarlaıdy QazAqparat tilshisi.
Oqıǵa Qyzylorda qalasynda turatyn Buqarbaı batyr kóshesiniń boıynda jaıaý júrginshiler jolynda boldy. Kólik ıesi joldan ótpekshi bolǵan eki azamatshany qaǵyp, oqıǵa orynan qashyp ketken.
Bul jóninde habar túskennen keıin jedel izdestirý sharalary bastaldy. Oqıǵa ornynda azamattardan surastyrý jumystary júrgizildi. Nátıjesinde 1 saǵat ishinde kúdikti avtokólik anyqtaldy.
«Kólik tizgindegen 36 jastaǵy qala turǵyny ekeni belgili boldy. Buǵan baılanysty QR Ákimshilik quqyq buzý kodeksiniń 610-babynyń 1-bóligimen hattama toltyryldy. Onda kólik quraldary júrgizýshileriniń jol júrisi qaǵıdalaryn adamdardyń densaýlyǵyna zııan keltirýge, kólik quraldarynyń nemese ózge de múliktiń búlinýine alyp kelgen buzýshylyǵy jaǵdaıy kórsetilgen. Oqıǵaǵa baılanysty Qyzylorda oblysy polıtsııa departamentiniń jergilikti polıtsııa qyzmeti basqarmasynyń aǵa ınspektory Nartaı Azat tııanaqty jumys atqardy», - dep málim etti Qyzylorda oblystyq polıtsııa departamenti baspasóz qyzmetinen.
Sondaı-aq, budan buryn Qyzylordada polıtseıler kisi ólimin izin sýytpaı ashty.
