Qyzylordada «Júrek jylýy» óner festıvali ótti
QYZYLORDA. QazAqparat - Qyzylorda qalasyndaǵy A.Toqmaǵanbetov atyndaǵy mádenıet úıinde múmkindigi shekteýli jasóspirimder men jastardyń oblystyq «Júrek jylýy» óner festıvali ótti, dep habarlaıdy QazAqparat tilshisi oblys ákimi baspasóz qyzmetine silteme jasap.
Oblystyq óner festıvali múmkindigi shekteýli jandardyń arasynda jyl saıyn uıymdastyrylady. Bıyl festıvalǵa 196 adam 7 janr boıynsha qatysty. Olar án, bı, kórkemsýret, qolóneri, kórkemsóz oqý, halyqtyq oryndaý, aspapta oınaý janrlary boıynsha óner kórsetti.
Ár janr boıynsha jeńimpazdar anyqtalyp, olarǵa qundy syılyqtar tabystaldy. Oblys ákimi Qyrymbek Kósherbaev baıqaýdyń jeńimpazdary men qatysýshylaryn quttyqtady.
«Elbasy óziniń dástúrli Joldaýynda «Múmkindigi shekteýli adamdar úshin Qazaqstan kedergisiz aımaqqa aınalýy tıis» dep atap kórsetkeni belgili. Erekshe jandardyń rýhanı damýyna, olardyń boıyndaǵy qabiletin, ónerin el aldyna shyǵarý maqsatynda óńirde «Júrek jylýy» óner festıvali dástúrli túrde jyl saıyn uıymdastyrylyp keledi. Biz bul rette qaısar aqyn Zeınolla Shúkirovti, ómirge qushtar aqyn Nurmuhammed Ábilqasymovty múmkindigi shektelse de, rýhy synbaǵan jandar dep úlgi etemiz» - dedi ol.
Oblys ákimi erekshe talant ıeleri Shıeli aýdanynyń sheberi Dılfrýz Hamıtqyzy men otbasylyq jup Qalı Dáýrenbek, Áıgerim Orazbaevaǵa 150 myń teńgeniń sertıfıkatyn tabystady.
Eske salaıyq, Qyzylordada tamyz aıynda múmkindigi shekteýli kásipkerler arasynda «Ózińe sene basta» atty kórme-baıqaýy ótip, jeńimpazdar jáne qatysýshylar qarjylaı sertıfıkattar men yntalandyrý syılyqtaryna ıe bolǵan edi.
Qazirgi tańda oblysta múmkindigi shekteýli 29 353 adam bar. Onyń ishinde I toptaǵy múgedekterdiń sany 2827, II toptaǵy 11145, III toptaǵy 10526 bolsa, al 18 jasqa deıingi balalardyń sany 4855-ti quraıdy.
2013 jyly Qyzylorda oblysy respýblıka boıynsha birinshi bolyp múmkindigi shekteýli jandardyń quqyqtaryn qorǵaý jáne ómirlerin jaqsartý maqsatynda Jol kartasyn ázirlep, qabyldady. Aǵymdaǵy jyly jeke ońaltý baǵdarlamasyn iske asyrý úshin oblystyq bıýdjetten 680 mln teńge bólindi. 2018 jyldyń birinshi jartyjyldyǵynda jumyspen qamtý ortalyǵy arqyly 376 múmkindigi shekteýli adamdy jalpy jumys oryndarymen, onyń ishinde 148 múgedek jan eńbekke tartyldy. 1275 adam shıpajaılarǵa emdelýge joldama alsa, 1569 janǵa oblys tarapynan áleýmettik-medıtsınalyq mekemelerde mamandar qyzmet kórsetti.
