Qyzylordada jolǵa shyǵyp ketken maldyń kesirinen 47 jol-kólik oqıǵasy tirkelgen

QYZYLORDA. QazAqparat - Qyzylorda oblysynda respýblıkalyq mańyzy bar avtojoldarǵa qaraýsyz júrgen maldyń shyǵyp ketýine baılanysty 47 jol-kólik oqıǵasy bolǵan. Olardyń arasynda adam ólimine soqtyrǵan derekter de tirkelgen, dep habarlaıdy QazAqparat tilshisi.

Bul jóninde Qyzylorda oblysy polıtsııa departamenti bastyǵynyń orynbasary Serik Shalqarov málim etti. Qazirgi tańda osyǵan baılanysty túngi ýaqytta jol-kólik oqıǵalarynyń aldyn alý maqsatynda eldi mekenderde túsindirý jumystaryn júrgizý baǵytynda qajetti is-sharalar qolǵa alynǵan. Halyqaralyq mańyzy bar avtomobıl jolynyń boıynda «Abaılańyz, úı janýarlary» degen maǵynadaǵy pannolary men metall qorshaý torlaryn ornatýǵa nazar aýdarylady.

«Oblys aýmaǵynda jol-kólik oqıǵalarynyń aldyn alý boıynsha «Avtobýs», «Qaýipsiz jol», «Jaıaý júrginshi», «Quqyq tártibi» jáne ózge de jedel-profılaktıkalyq is-sharalar ótkizildi. Sonymen qatar, ár aptanyń juma, senbi jáne jeksenbi kúnderi qoǵamdyq tártip pen qaýipsizdikti qamtamasyz etý maqsatynda, qala jáne aýdandardaǵy polıtsııa qyzmeti kúsheıtilgen túrine kóshirilip, «Túngi qala», «Qaýipsiz aýla» atty qysqa merzimdi jedel-profılaktıkalyq is-sharalar uıymdastyrylyp ótkizilýde», - dep málimdedi S.Shalqarov.

Eske sala ketsek, buǵan deıin Aqmola oblysynda kólik qaǵyp ketken maldyń ıesi izdestirilip jatqanyn habarlaǵan bolatynbyz.