Qyzylordada Joldaý aıasyndaǵy máseleler talqylandy
Memleket basshysy Nursultan Nazarbaevtyń 2018 jylǵy 5 qazandaǵy «Qazaqstandyqtardyń ál-aýqatynyń ósýi: tabys pen turmys sapasyn arttyrý» Qazaqstan halqyna Joldaýynyń negizgi mindetterin júzege asyrý jaıynda oblys ákimi Qyrymbek Kósherbaev oblys aktıviniń jıynynda keńinen toqtalyp ótti. Іs-sharaǵa onlaın rejıminde oblys aýdandarynyń aktıvteri qatysty.
Jıynda ár salanyń ókilderi joldaýǵa qatysty oı-pikirin bildirdi. Olardyń qatarynda «Syr marjany» JShS bas dırektory Minajadın Ýteev, óńirlik kásipkerler keńesiniń tóraǵasy Asqar Mahambetov, oblystyq medıtsına ortalyǵynyń dırektory, oblystyq máslıhat depýtaty Nurıdın Amıtov, M.Mámetova atyndaǵy joǵary pedagogıkalyq kolledj dırektory Baqytjan Saılybaev jáne Sankt-Peterbýrg ýnıversıtetiniń túlegi, «SKZ-U» zaýytynyń ınjener-tehnology Jazıra Smaıylova oı-pikirlerin bildirdi.
Aımaq basshysy táýelsizdik jyldary kóp jumys atqarylyp, jańa memleket qurý baǵytynda beıbitshilik pen qoǵamdyq kelisimdi qamtamasyz etý múmkindigi jasalǵanyna toqtaldy. Qazaqstannyń halyqaralyq bedeli artyp, onyń geosaıası róliniń kúsheıýine qol jetti.
«Búgingi aktıv jıyny Memleket basshysynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna arnaǵan Joldaýyna jáne «Bolashaqqa baǵdar: rýhanı jańǵyrý» atty baǵdarlamalyq maqalasy boıynsha aldaǵy mindetterdi aıqyndaýǵa arnalady. Jahandaný zamanynda árbir ulttyń ózin-ózi tanýǵa umtylýy - zańdylyq. Osy rette Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasy Rýhanı silkiniske jol kórsetýshi baǵdar retinde jappaı qoldaýǵa ıe boldy. Ol qoǵamdaǵy jańǵyrý úderisterine zor serpin berdi. Sondyqtan bul bastamany ári qaraı jalǵastyra otyryp, onyń aıasyn jańa mazmunmen jáne tyń baǵyttarmen tolyqtyra beretin bolamyz», - dedi oblys ákimi.
Aımaq basshysy Joldaýdaǵy adamı kapıtaldy damytý jónindegi pikirdi erekshe atap ótti.
«Zamanaýı qoǵamda áleýmettik-ekonomıkalyq damýdyń sandyq emes, sapalyq sıpattamalary birinshi orynǵa qoıylady. Qazirgi tańda ekonomıkalyq ósimniń jáne bar qundylyqtyń negizgi qozǵaýshy kúshi - adam, onyń bilimi men daǵdysy bolýy kerek. Onyń ónimdi eńbek áreketteri bilimine, daǵdysyna, tájirıbesine baılanysty bolady. Osylaısha ekonomıkalyq ósimniń de joǵary sapasy qamtamasyz etiledi», - dedi Qyrymbek Eleýuly.
Memleket basshysy bıznesti órkendetýdiń mańyzdylyǵyn taǵy da atap ótip, qazaqstandyqtardyń basym bóligin tabyspen qamtamasyz etýde onyń tıimdiliginiń zor ekenin aıtqanyn jetkizgen oblys ákimi bıyl Syr óńirinde «Jappaı kásipkerlikti qoldaý jyly» dep jarııalanǵanyn atap ótti. Bul baǵytta atqarylǵan jumystar oń nátıjesin berdi. Soǵan oraı, 2018-2020 jyldardy oblysta jappaı kásipkerlikti damytýdyń úsh jyldyǵy dep qaıta jarııalandy. Qyzylorda oblysy jumys jasap turǵan shaǵyn jáne orta bıznes nysandarynyń sany boıynsha jyl basynan beri óńirler arasynda kósh bastap tur.
Ústimizdegi jyldyń 9 aıynyń qorytyndysymen kásipkerlik salasynda 101 jobaǵa nesıe boıynsha paıyzdyq mólsherlemelerdi sýbsıdııalaý maquldandy. Sondaı-aq, shaǵyn jáne orta bıznes nesıesi boıynsha 52 jobaǵa kepildik usynyldy, granttyq qarjylandyrýǵa 200 mln. teńge bólinip, oblystyń 224 kásipkeriniń jobasy qoldaý tapty. Budan basqa, ónimdi jumyspen qamtý jáne jappaı kásipkerlikti damytý baǵdarlamasy aıasynda 2018 jyly respýblıkalyq bıýdjetten mıkrokredıtter berý úshin 3489 mln teńge jáne oblystyq bıýdjetten mıkrokredıtterdi ulǵaıtý úshin 1 mlrd teńge bólindi.
Aımaq basshysy óńirdiń basqa da jetistikterin, ári qaraı sheshilýi tıis máselelerin atap ótip, jaýapty tulǵalarǵa birqatar tapsyrmalar júktedi.
Qorytyndylaı kele, oblys ákimi Qyrymbek Kósherbaev áriptesterin Elbasynyń alǵa qoıǵan mindetterin júzege asyrýǵa shaqyrdy.
