Qyzylordada jolda qalyp qoıǵan jolaýshylar qutqaryldy

QYZYLORDA. QazAqparat - Qyzylorda oblysynda qutqarýshylar kólikteri buzylyp, jolda qalyp qoıǵan jolaýshylarǵa kómek kórsetti, dep habarlaıdy QazAqparat tilshisi.

Jolaýshylar «Shymkent-Samara» tas jolynyń 836 shaqyrymynda jolda qalyp qoıǵan. Olar mingen «GAZel» avtokóliginiń qozǵaltqysh bóligi isten shyqqan.

«Bul jóninde Aral aýdany №3 mamandandyrylǵan órt sóndirý bóliminiń baılanys beketine habarlama tústi. Oqıǵa ornyna órt sóndirý qyzmetiniń qutqarý jasaǵy Qamystybas eldi mekeniniń bólimshesinen 2 maman, 1 tehnıka jedel jetti. Nátıjesinde qutqarýshylar kúshimen 3 adam Qamystybas eldi mekenindegi qutqarý bólimshesine jetkizildi», - dep málim etti Qyzylorda oblystyq Tótenshe jaǵdaılar departamenti Órt sóndirý jáne avarııalyq qutqarý qyzmetiniń baspasóz hatshysy Ásııa Erejepova.