Qyzylordada jolda aýdarylǵan kólik ishinen bir otbasynyń bes adamy qutqaryldy

QYZYLORDA. QazAqparat - Qyzylorda oblysy Aral aýdany qutqarý bólimshesiniń mamandary kezekshilik qyzmetinde jol-kólik oqıǵasyna ushyraǵan bir otbasyndaǵy bes adamdy qutqaryp qaldy, dep habarlaıdy QazAqparat tilshisi.

Atalǵan oqıǵa búgin, 28 sáýirde tańǵy ýaqytta bolǵan. Sol sátte Aral aýdanynyń qutqarý bólimshesiniń basshysy Eldos Jıenalıev pen qutqarý bólimshesiniń medbıkesi Ásııa Bazarbaeva Aralqum eldi mekeninen aýdan ortalyǵyna qyzmettik kezekshiligin atqarýǵa bara jatqan bolatyn. Jolda olar aýa raıynyń qolaısyzdyǵy saldarynan «Hyundai Santa Fe» markaly avtokóliginiń aýdarylyp qalǵanyn baıqaıdy. Keıinnen belgili bolǵanyndaı, jeńil kólik úsh márte aýdarylǵan. Qutqarýshylar dereý olarǵa qolushyn sozýǵa kiristi.

«Kólik ishindegi azamattar Aqtóbe oblysynda turady. Otbasy músheleri Shymkent qalasynan em alyp, turǵylyqty jerine qaıtyp kele jatqan beti eken. Qaıtar jolǵa otbasy músheleri taksı qyzmetin jaldaıdy. Qutqarýshylar kómegimen kólik ishindegi erli-zaıyptylar jáne úsh birdeı bala qaýipsiz jerge shyǵaryldy. Oqıǵa ornynda alǵashqy medıtsınalyq kómek kórsetildi. Otbasy músheleri aýdandyq aýrýhanaǵa jetkizildi. Jol-kólik oqıǵasynan áıel adam túrli deńgeıdegi dene jaraqatyn alǵan. Oǵan aýdandyq aýrýhanada ota jasaldy. Onyń kúıeýi balalarynyń biriniń qolyna qatty zaqym kelýine baılanysty úsh balasymen Aqtóbe qalasyna jol tartty», - dep málim etti oblystyq tótenshe jaǵdaılar departamenti órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.

Budan buryn Qyzylordada polıtseıler joǵalyp ketken balalardy taýyp berdi.