Qyzylordada jolaýshylar poıyzdaryna jasalǵan reıdte kóptegen kemshilikter anyqtaldy
QYZYLORDA. QazAqparat - Qyzylordada jolaýshylar poıyzyna jasalǵan reıd barysynda kóptegen kemshilikter anyqtaldy. Reıdte tehnıkalyq baıqaýdan ótpegen vagondarmen jolaýshylar tasymaldap júrgen jaǵdaılar belgili boldy, dep habarlaıdy QazAqparat tilshisi.
Reıd «Aqmeshit - adaldyq alańy» jobalyq keńsesiniń qyzmetkerleri, QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamenti men Qyzylorda oblysynyń kóliktik baqylaý ınspektsııasy mamandary tarapynan júrgizildi.
Reıd barysynda №41 «Almaty-Atyraý» jolaýshylar poıyzynyń 17-shi jáne 16-shy vagonynda tósek-oryn jabdyqtary 2017 jyldan bastap jańartylmaǵany anyqtaldy. Negizinde ol alty aı saıyn jańartylý qajet. Al 6 vagonda gıgıenalyq tazalyq zattary joq. Sondaı-aq, aýyz sý qondyrǵylary ornatylmaǵan. Aıta keterligi, sońǵy 6 aıdan beri tehnıkalyq baıqaýdan ótpegen vagon qoldanysta júrgen.
Tozyǵy jetken tósek-oryndar, aýyz sý qurylǵylarynyń ornatylmaýy, gıgıenalyq zattardyń joq ekendigi №56 «Qyzylorda-Kókshetaý» poıyzynda da anyqtalǵan.
«QR Memlekettik qyzmet isteri jáne sybaılas jemqorlyqqa qarsy is-qımyl agenttigi men «Jolaýshylar tasymaly» AQ arasynda temirjol jolaýshylar kóliginde sybaılas jemqorlyqqa qarsy is-qımyl jónindegi yntymaqtastyq týraly kelisim bar. Osyǵan sáıkes qoǵam ókilderimen birlese otyryp reıd jumystaryn turaqty túrde júrgizip kelemiz. Oblys kóleminde «Adal jol» jobalyq toby quryldy. Sodan beri jalpy 37 bıletsiz azamat anyqtalyp, 13 jolserik ákimshilik jaýapkershilikke tartyldy. Temirjol vokzalynda jolaýshylar poıyzyna zańsyz aqsha alyp, bıletsiz mingizip jiberetin 6 qosalqy kómekshi (pomogaıka) ákimshilik, qylmystyq jaýapqa tartyldy. Vagondardan tehnıkalyq, sanıtarlyq jáne taǵy basqa 80-nen asa kemshilikter anyqtaldy. Anyqtalǵan kemshilikter negizinde akt toltyrylyp, kináli tulǵalarǵa ákimshilik quqyq buzýshylyq týraly hattamalar rásimdeldi», - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttigi Qyzylorda oblysy boıynsha departamenti basshysynyń orynbasary Berikbol Baıhojaev.
«Aqmeshit - adaldyq alańy» jobalyq keńsesimen aldaǵy ýaqytta da jolaýshylar poıyzdaryndaǵy kórsetiletin qyzmetterge, jolserikterdiń jumysyna, bıletsiz júrý faktilerine monıtorıng jumystary júrgiziletin bolady.
