Qyzylordada jolaqysy 90 teńgege kóterildi
QYZYLORDA. QazAqparat - Búginnen bastap Qyzylorda qalasyndaǵy qoǵamdyq kólikter jolaqysy 70 teńgeden 90 teńgege kóterildi, dep habarlady QazAqparat tilshisi.
Qalalyq ákimdiktiń taratqan málimetine súıensek, jolaqy baǵasynyń qymbattaýy naryqtyq ekonomıkaǵa baılanysty bolyp otyr. Sebebi, 2016 jylmen salystyrǵanda janar-jaǵarmaı men qosalqy bólshekterdiń baǵasy, onyń ishinde «Aı-92» markaly benzınniń baǵasy 124 teńgeden 143 teńgege, ıaǵnı 14 paıyzǵa, dızel otyny 80 teńgeden 130 teńgege, 38 paıyzǵa, gaz otyny 30 teńgeden 58 teńgege, ıaǵnı 93 paıyzǵa ósken.
«Qyzylorda avtobýs parki» JShS dırektorynyń orynbasary Qanat Rahmetovtiń aıtýynsha, janar-jaǵarmaı men qosalqy bólshekter baǵasynyń ósýinen «Qyzylorda avtobýs parki» JShS tolyqtaı shyǵynmen jumys isteýde. Sondyqtan, qoǵamdyq kólikterdiń qyzmetin turaqty qamtamasyz etý maqsatynda jolaqy baǵasyn kóterý boıynsha usynys engizildi.
«Tarıfti kóterý zańdylyqtarǵa sáıkes jasaldy. Ádistemelik eseptemeler boıynsha salystyrǵanymyzda bıyl bir jolaýshynyń ortasha jol júrý quny 232 teńgege shyǵyp otyr. 232 teńgeni tóleýge halyqtyń qaltasy kótermeıdi. Sondyqtan biz eresekter úshin 100 teńge, oqýshylar úshin 50 teńge dep belgileýdi qalalyq jolaýshylar tasymaly bólimine usyndyq. Zańdylyqtardy qarap, qalalyq máslıhat depýtattarynyń quzyryna berdi. Olar 90 da 40 teńgege bekitti», - deıdi ol.
