Qyzylordada jol-kólik oqıǵasynan mototsıkl júrgizýshisi kóz jumdy
QYZYLORDA. QazAqparat - Qyzylorda qalasyndaǵy Nursultan Nazarbaev dańǵyly boıynda «Lada Granta» markaly avtokólik pen «Motogýzzı» mototsıkly soqtyǵysty. Alǵan jaraqaty saldarynan mototsıkl júrgizýshisi aýrýhanada kóz jumdy, dep habarlaıdy QazAqparat tilshisi.
Bıylǵy jyldyń 23 mamyr kúni Qyzylorda qalasynda N.Nazarbaev dańǵyly boıynda «Lada Granta» markaly avtokólik pen «Motogýzzı» mototsıkly soqtyǵysyp, saldarynan mototsıkl júrgizýshisi qalalyq aýrýhanaǵa jatqyzyldy. Alǵan jaraqat saldarynan ol aýrýhanada qaıtys boldy. Atalǵan derek boıynsha QR Qylmystyq kodeksiniń 345-babynyń 3-bóligimen sotqa deıingi tergep-tekserý amaldary júrgizilýde. Onda kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy jaǵdaıy kórsetilgen.
«Qazirgi tańda tıisti saraptamalar taǵaıyndaldy. Oqıǵanyń mán-jaılary anyqtalýda», - dep málim etti Qyzylorda oblysy Polıtsııa departamentiniń baspasóz qyzmeti QazAqparat tilshisine.
