Qyzylordada jol-kólik oqıǵalarynyń sany artqan
QYZYLORDA. QazAqparat - Sońǵy jyldarda Syr óńirinde jol-kólik oqıǵalarynyń sany artyp ketti. Sonyń saldarynan jol apatynan qaza bolǵandar men zardap shekken adamdar kóbeıdi, dep habarlaıdy QazAqparat tilshisi.
Quqyq buzýshylyqtyń aldyn alý jónindegi oblystyq vedomstvoaralyq komıssııanyń otyrysynda atalmysh másele keńinen talqylandy. Onda oblys ákimi apparaty basshysynyń orynbasary Serik Shotaev barlyq memlekettik organdar sońǵy ýaqytta ósý qarqynymen erekshelengen qylmystardyń aldyn alýǵa basa nazar aýdarý qajettigine toqtaldy. Sondyqtan osy baǵyttaǵy jumystardy kúsheıtý qajet.
«Sońǵy jyldary oblysta jol-kólik oqıǵasynyń sany artyp ketti. Ótken jyldyń qorytyndysy boıynsha jol-kólik oqıǵasynyń sany 20 paıyzǵa ósken. Sondaı-aq, jol apatynan qaza bolǵandar sany - 11, al zardap shekkender sany 22 paıyzǵa kóbeıdi», - dedi Serik Shotaev.
Komıssııa otyrysynda oblys ákimi Qyrymbek Kósherbaev atalmysh másele jóninde oı-pikirin bildirdi. Qazirgi tańda oblystyq polıtsııa departamentiniń materıaldyq-tehnıkalyq bazasy nyǵaıyp keledi. Alaıda, aıtarlyqtaı nátıje joq.
«Qyzylorda qalasy men aýdan ákimderine, ýákiletti organdardyń basshylaryna álemdik tájirıbeni eskere otyryp, qylmysqa qarsy kúres jónindegi jol kartasyn qysqa merzimde ázirleýdi tapsyramyn. Bul jumystardyń formaldy júrgizilýine jol berilmesin», - dedi oblys ákimi.
Esterińizge sala ketelik, 2018 jyldyń qazan aıynda tórt adamnyń ómirin qıǵan jol apaty oryn alǵan bolatyn.
Sondaı-aq, 2018 jyldyń qarasha aıynda Qyzylorda oblysynda eki avtobýs soqtyǵysyp, oqıǵa ornynda úsh adam kóz jumǵan edi.
