Qyzylordada jol boıynda júk kóligi túgi qalmaı órtenip ketti
QYZYLORDA. QazAqparat - Búgin Qyzylorda qalasy tusyndaǵy «Batys Eýropa- Batys Qytaı» kúre jolynyń boıynda júk kóligi tolyǵymen órtenip ketti, dep habarlaıdy QazAqparat tilshisi.
Tótenshe jaǵdaılar qyzmetine habarlama saǵat 20.12-de kelip tústi. Atalǵan shaqyrtý boıynsha oqıǵa ornyna órt sóndirý qyzmetiniń jeke quramy jedel jetti.
«Barlaý jumystaryn júrgizgen mamandar júk kóliginiń tirkemesinde tıelgen shınalar jáne avtobólshekter janyp jatqanyn anyqtady. Kýágerlerdiń aıtýynsha, júrgizýshi kúıik shalyp, oblystyq aýrýhanaǵa jóneltilgen. Avtokólik júrgizýshisi 1969 jyly dúnıege kelgen Oral qalasynyń týmasy ekeni anyqtaldy. Kólik júrgizýshisin 80 paıyz kúıik shalǵan. Ol oblystyq medıtsınalyq ortalyǵynyń jan saqtaý bólimine jatqyzylǵan», - dep málim etti Qyzylorda oblysy Tótenshe jaǵdaılar departamentiniń Órt sóndirý jáne avarııalyq qutqarý jumystary qyzmeti.
Órt 21:17-de tolyǵymen sóndirildi. Qazir órttiń shyǵý saldary men shyǵyny anyqtalý ústinde.
Sondaı-aq, budan buryn Qyzylordada gaz ballony jarylysynan úsh adam jaraqat aldy.
