Qyzylordada jol boıynda adam qaǵyp, oqıǵa ornynan qashyp ketken júrgizýshi ustaldy
QYZYLORDA. QazAqparat - Qyzylorda oblysynda jol boıynda adam qaǵyp, oqıǵa ornynan qashyp ketken kólik júrgizýshisi qolǵa tústi, dep habarlaıdy QazAqparat tilshisi.
Oqıǵa 30 qazan kúni Shıeli aýdanyna qarasty Tartoǵaı aýylynyń tusyndaǵy «Shymkent-Samara» tas jolynyń boıynda boldy. Tas joldy kesip ótpek bolǵan aýyldyń 48 jastaǵy turǵynyn belgisiz avtokólik ıesi qaǵyp, oqıǵa ornynan qashyp ketken. Avtokólik Qyzylordadan Shymkent qalasyna bara jatqan. Jol-kólik oqıǵasy saldarynan azamatsha túrli dene jaraqatyn alyp, aýdandyq aýrýhanaǵa jetkizildi.
«Patrýldik polıtsııa rota qyzmetkerleri jedel izdestirý júrgizdi. Nátıjesinde sol aýdandaǵy Báıgequm eldi mekeniniń tusynda júk tasymaldaıtyn «GAZel» avtokóligine «Mercedes» avtokóligin tıep jatqan júrgizýshi ustaldy. Ol Túrkistan oblysyna qarasty Qazyǵurt aýylynyń 24 jastaǵy turǵyny bolyp shyqty», - dep málim etti Qyzylorda oblystyq polıtsııa departamentiniń baspasóz qyzmeti.
Departament málimetinshe, atalǵan derek boıynsha QR Qylmystyq kodeksiniń 345-babynyń 1-bóligimen sotqa deıingi tergep-tekserý amaldary júrgizilýde.
Sondaı-aq, Qyzylordada jeńil avtokólik aıaldamany qıratyp ketkenin habarlaǵan edik.
