Qyzylordada jol apatynan zardap shekken 6 adam aýrýhanaǵa jetkizildi
QYZYLORDA. QazAqparat - Qyzylordada jol-kólik oqıǵasynan keıin 6 adam medıtsınalyq mekemege jetkizildi, dep habarlaıdy QazAqparat tilshisi.
«Batys Qytaı - Batys Eýropa» tasjolynyń Shıeli aýdany aýmaǵyndaǵy bóliginde belgisiz adamdar joldyń júris bóligindegi temir qorshaýdy óz betinshe ashyp tastaǵan. Bul jol-kólik oqıǵasynyń bolýyna alyp keldi.
Oqıǵa 11 maýsymda Shıeli aýdanyndaǵy R-10 kanaly tusynda bolǵan. Sol aýmaqta jeńil jáne júk kóligi soqtyǵysty.
Saldarynan jeńil avtokólikte kele jatqan 6 adam medıtsınalyq mekemege jetkizildi. Qaıtys bolǵandar joq.
«Júk kóliginiń júrgizýshisine qatysty QR Ákimshilik quqyq buzý kodeksi 610-babynyń 2-bóligine sáıkes qujattar jınaqtalýda. Jol-kólik oqıǵasynyń sebepteri anyqtalyp jatyr. Sondaı-aq, joldyń júris bóligindegi temir qorshaýdy óz betinshe ashý deregi boıynsha kináli adamdardy anyqtaý maqsatynda jan-jaqty tekserý jumysy bastaldy. Jol apatyna qatysty 2 avtokólik aıyp turaǵyna jetkizildi» dep málim etti Qyzylorda oblystyq polıtsııa departamentinen.
Vedomstvo málimetinshe, jeńil avtokóliktiń júrgizýshisine qatysty QR Ákimshilik quqyq buzý kodeksiniń 593-baby 1-bóligine sáıkes qujat jınalyp jatyr.
Onda jolaýshy jáne júk tasymaldaý qaǵıdalaryn saqtamaý jaǵdaıy kórsetilgen.
Eske salsaq, budan buryn Qyzylordada kóshede myltyq alyp júrgen turǵyn qolǵa tústi.
