Qyzylordada jol apaty tórt adamnyń ómirin qıyp ketti
QYZYLORDA. QazAqparat - Qyzylorda oblysynda jol apatynan tórt adam kóz jumyp, bir adam dene jaraqatyn aldy, dep habarlaıdy QazAqparat tilshisi.
Oqıǵa 29 mamyrda saǵat túngi 23.00 shamasynda bolǵan. «Batys Eýropa - Batys Qytaı» tas jolynyń Qyzylorda oblysy aýmaǵyndaǵy 1466 shaqyrymynda MAN júk kóligi men «Mercedes» jeńil kóligi soqtyǵysqan. Keleńsiz jaǵdaı Qazaly aýdanynyń aýmaǵynda bolǵan.
«Atalǵan jol-kólik oqıǵasy boıynsha QR Qylmystyq kodeksiniń 345-babynyń 4-bóligimen sotqa deıingi tergep-tekserý amaldary júrgizilýde. Onda avtomobıldi basqaratyn adamnyń jol júrisi qaǵıdalaryn buzyp, abaısyzda eki nemese odan da kóp adamnyń ólimine ákep soǵý jaǵdaıy kórsetilgen. Jol apatynan 4 adam kóz jumdy, al 1 adam dene jaraqatymen medıtsınalyq mekemege jetkizildi. Tıisti sot saraptamalary taǵaıyndaldy. Oqıǵanyń mán-jaılary anyqtalýda», - dep málim etti Qyzylorda oblystyq polıtsııa departamentiniń baspasóz qyzmetinen.
Eske salsaq, budan buryn Qyzylorda oblysynda jeńil kólik tolyǵymen órtenip ketti.
