Qyzylordada joǵalǵan úsh jasóspirim qyzdyń ekeýi Almatydan tabyldy
QYZYLORDA. QazAqparat - Qyzylordada eki kúnnen beri habarsyz ketken úsh jasóspirim qyzdyń ekeýi Almaty qalasynan tabyldy, dep habarlaıdy QazAqparat tilshisi.
Esterińizge sala ketelik, 25 naýryz kúni keshki ýaqytta Qyzylorda qalasyndaǵy «Atameken» balalar aýylynda tárbıelenip júrgen 15-16 jastaǵy úsh jasóspirim qyz belgisiz sebeppen ketip qalǵan. Sodan beri olardy izdeý júrgizildi.
Osy maqsatta qalalyq polıtsııa basqarmasynyń jeke quramy tıisti sharalardy atqardy. Oblys ortalyǵyndaǵy kópqabatty úılerdiń shatyrlary, saıajaılar, tastandy úıler men qurylysy bitpegen ǵımarattar, oıyn-saýyq ortalyqtary men jaldamaly páterler tekserildi. Olardyń fotosýretteri kórsetilip, surastyrý jumystary júrgizilgen.
Іzdeý sharalaryna eriktiler de qosyldy. Oǵan belsendi azamattar men janashyr eriktiler tartyldy.
«Osyndaı jumystardyń nátıjesinde qyzdardyń ekeýi 27 naýryzda keshki ýaqytta Almaty qalasynda júrgeni anyqtaldy. Olardy tabýǵa turǵyndardyń qyraǵylyǵy men polıtseılerdiń kásibı sheberligi áser etti. Bul baǵytta baǵdarlardy barlyq áleýmettik jeliler men buqaralyq aqparat quraldaryna jappaı taratý paıdasyn tıgizdi. Qazir qyzdar Almaty qalasyndaǵy balalar úıine jetkizildi. Úshinshi kámeletke tolmaǵan qyz áli izdestirilip jatyr», - dep málim etti Qyzylorda oblystyq polıtsııa departamentinen.
