Qyzylordada joǵalǵan 3 jasar bala aǵash arasynda uıyqtap jatqan jerinen tabyldy
ASTANA. QazAqparat - Qyzylorda polıtsııa qyzmetkerleri joǵalyp ketken búldirshin men úıinen shyǵyp ketip, qaıta oralmaǵan jasóspirimdi taýyp, otbasylaryna qaıtardy, dep habarlaıdy oblystyq ІІD-niń baspasóz qyzmeti.
29 aqpanynda keshke saǵat 20.30 shamasynda Jedel josparlaý basqarmasyna 3 jastaǵy balanyń joǵalyp ketkendigi jaıly habar kelip túsedi. Osy oqıǵa boıynsha oblystyq departamenttiń jáne qalalyq ishki ister basqarmasynyń jedel tergeý toby, ýchaskelik polıtsııa jáne jol-patrýldik polıtsııa qyzmetkerleri jiberilip, Tótenshe jaǵdaılar departamentine habarlandy.
Birneshe saǵatqa sozylǵan sharalar barysynda sol aýmaqtaǵy kóp qabatty turǵyn úılerdiń jertóleleri, kireberisteri, bitpeı qalǵan aıaqtalmaǵan qurylys nysandary, saıajaı aýmaǵy tekserilip, kórgen-bilgen adamdardan jaýaptar alyndy.
Keıin 3 jastaǵy búldirshin Tasbóget kenti, PMK-19 saıajaıynyń batys jaǵynan 4 shaqyrym jerde jyńǵyl aǵashtarynyń arasynda uıyqtap jatqan jerinen tabyldy.
Arada birneshe saǵattan keıin taǵy bir jasóspirimniń joǵalyp ketýi jaıly derek tirkeledi. Sol kúni keshke shamasynda 14 jastaǵy 8 synyp oqýshysy Tasbóget kentinde turatyn ájesiniń úıinen ketip, oralmaǵan. Jedel túrde izdestirý sharalary júrgizilip, jasóspirimnyń turpattyq beınesi, erekshe belgileri jasalady. Úıden ketip qalýyna sebep bolarlyq jaıttar jan-jaqty qaralyp, barýy múmkin oryndar tekserildi, qurbylary men dostarynan túsiniktemeler alyndy. Polıtsııa qyzmetkerleriniń júrgizgen izdestirý sharalarynyń nátıjesinde 14 jasar jasóspirim qyz birneshe saǵattan keıin tabyldy.
«Qazirgi tańda, 2 jasóspirimniń de jaǵdaıy «jaqsy» dep baǵalanýda, din aman ata-analaryna tapsyryldy. Tıisti tekserý jumystary júrgizilýde», delingen habarlamada.
