Qyzylordada jiti ishek ınfektsııasyn juqtyrý 30,5 paıyzǵa artyp otyr

QYZYLORDA. QazAqparat - Qyzylorda oblysynda bıyl jiti ishek ınfektsııasyn juqtyrýdyń 281 jaǵdaıy tirkelgen. Ol byltyrǵy jyldyń dál osy kezeńimen salystyrǵanda 30,5 paıyzǵa artyp otyr, dep habarlaıdy QazAqparat tilshisi.

Atalǵan aýrýǵa shaldyqqan azamattardyń 88 paıyzyn oblys ortalyǵynyń turǵyndary quraıdy.

«Tirkelgen jiti dıareıanyń jartysynan astamy balalardyń úlesine tıedi. Naýqastardyń 87 paıyzyn 14 jasqa deıingi balalar quraıdy. Onyń ishinde joǵarǵy aýrýshandyq kórsetkish 2 jasqa deıingi balalar arasynda tirkelgen», - dep málim etti oblystyq sanıtarııalyq-epıdemıologııalyq baqylaý departamentinen.

Epıdemıologııalyq saýalnama júrgizý barysynda aýrý juqtyrý sebepteriniń 80 paıyzy tamaq ónimderine qatysty.

«Al, 12 bala kútiminiń nasharlaýyna qatysty týyndaǵan. Al 8 paıyzy jemis-jıdektermen baılanysty boldy. Oblys kóleminde jyl basynan beri taǵam ónerkásibi, azyq-túlik saýdasy, qoǵamdyq tamaqtaný nysandary, uıymdasqan ujymdardyń as bloktarymen baılanysty tamaqtan ýlaný jaǵdaıy bolǵan joq», - dep túsindirdi departamentten.

Mamandardyń aıtýynsha, kúnniń jylynýyna baılanysty jedel ishek ınfektsııasy aýrýynyń qaýpi kúrt arta túsedi. Sebebi aýa temperatýrasynyń joǵarylaýynan syrtqy ortada aýrý qozdyrǵyshtarynyń tirshilik etýine jáne kóbeıýine qolaıly orta qalyptasady.

Eske salsaq, budan buryn Qyzylordanyń aýyl turǵyndary shybyn-shirkeıden teri aýrýynyń taralýyna alańdaýly ekenin habarlaǵan edik.