Qyzylordada jergilikti turǵyndardy kenelerdiń belsendiligi alańdatyp otyr
QYZYLORDA. QazAqparat - Qyzylorda oblysynda sońǵy kúnderi jergilikti turǵyndardy kenelerdiń belsendiligi alańdatyp otyr, dep habarlaıdy QazAqparat tilshisi.
Aıta keteıik, óńir kongo-qyrym gemorragııalyq qyzbasynyń tabıǵı oshaǵynda ornalasqan. Bıyl oblysta oǵan baılanysty 113 eldi meken qolaısyz aýmaq retinde esepke alyndy.
Mundaı eldi mekenderdiń basym kópshiligi Jalaǵash jáne Aral aýdandarynda ornalasqan. Qazir epıdmaýsymnyń bastalýy baıqalady. Soǵan oraı qolaısyz eldi mekenderde mamandar tarapynan asa qaýipti juqpaly aýrýǵa qarsy profıaktıkalyq sharalar da júzege asyrylýda.
«Entomolog mamandardan turatyn 3 arnaıy jumysshy top qurylǵan. Mamandar eldi mekenderde zoologııalyq barlaý jumystaryn júrgizýde. Jumys barysynda 2163 kene jınalyp, 226 synama zertteldi. Ázirge kongo-qyrym gemorragııalyq qyzbasyna baılanysty oń nátıje anyqtalǵan joq. Degenmen, kenelerdiń eresek jáne nımfa (jas) túrleri tabıǵatqa belsendi shyǵa bastaǵany belgili boldy. Jyl basynan beri kene shaǵýmen medıtsınalyq kómekke 2 adam júgingen», - dep málim etti Qyzylorda oblysy sanıtarlyq-epıdemıologııalyq baqylaý departamentiniń baspasóz qyzmetinen.
Vedomstvonyń habaralýynsha, jyl saıyn barlyq qolaısyz eldi mekenderde sanıtarııalyq-qorǵanysh aımaqtaryn qurý úshin kenege qarsy óńdeý sharalary júzege asyrylady. Bıyl zalalsyzdandyrý jumystary 42,85 sharshy shaqyrym jer kólemine júrgiziledi. Alǵashqy kezeńi sáýir men maýsym aralyǵynda bastalady.
