Qyzylordada jergilikti kásipkerlerdiń quny 78,7 mln teńge bolatyn 29 jobasy qarjylandyryldy
QYZYLORDA. QazAqparat- Qyzylorda oblysynyń Qarmaqshy aýdanynda Kásipkerler palatasynyń fılıaly jańa baǵdarlama boıynsha 107 azamatty oqytty. Qazirgi tańda, osy azamattardyń jalpy quny 78,7 mln. teńgeni quraıtyn 29 jobasy qarjylandyryldy, dep habarlady QazAqparat tilshisi oblystyq kásipkerler palatasyna silteme jasap.
«Aýyl azamattarynyń basym bóligi nesıeni mal sharýashylyǵyna alýda. Naqtyraq aıtqanda olar qarjyny maldy bordaqylaý, mal basyn kóbeıtý, sút, et ónimderin shyǵarý sııaqty sharalarǵa salýda»,- deıdi oblystyq kásipkerler palatasynyń Qarmaqshy aýdanyndaǵy fılıalynyń dırektory Abzal Shoqparov.
Bastaý Bıznes» jobasy kásipkerlikti aýylda damytýǵa baǵyttalǵan. Sondaı-aq, aýyl halqynyń jumyspen qamtylý deńgeıin bıznes-bastamalar men halyqty kásipkerlik negizderine jan-jaqty úıretý arqyly kóterýdi maqsat tutady. «Bastaý Bıznes» jobasy boıynsha oqytýdyń uzaqtyǵy 1 aı.
Aýdan turǵyny Qaıyrbek Áben osy joba aıasynda bilim alyp, bıznes josparyn jasap, qorǵaǵan jáne aýyl sharýashylyǵyn qoldaý qory arqyly 3,5 mln.teńge nesıe aldy. Alynǵan qarajatqa Qaıyrbek óziniń Bıznes josparyna sáıkes «Marjan» jarnama agenttigin ashyp, oǵan qajetti qural-jabdyqtaryn aldy. Jas kásipker búginde jumysyn bastap ta ketti. Shaǵyn eki bólmeni jaldap, tapsyrystar qabyldaýda.
«Bastaý Bıznes» jobasy maǵan óz maqsatyma jetýge múmkindik berip otyr. Joba aıasynda bir aı biliktiligimdi jetildirdim. Bıznes-josparymdy quryp, ony komıssııa aldynda qorǵap, búginde qarmaqshylyqtarǵa qyzmet kórsetýdemin», - deıdi jas kásipker Qaıyrbek Áben.
Ashylǵanyna eki-aq apta bolǵan jarnama ortalyǵy alǵashqy tapsyrystaryn qabyldap ta úlgerdi. Polırgafııalyq qyzmettiń birneshe túrin oryndaıtyn ortalyqqa kelgen tapsyrys berýshiler óz rızashylyqtaryn bildirýde.
«Bastaý Bıznes» jobasy aıasynda kásibin bastaǵan jas kásipkerdiń aldaǵy jospary da aýqymdy. Ol keleshekte keńsesin keńeıtip, polıgrafııalyq qyzmet túrlerin kóbeıtýdi oılastyrýda.
