Qyzylordada jergilikti bıýdjettiń tórtinshi deńgeıin engizý tetikteri qaraldy
Jıynda atalǵan másele týraly oblystyq ekonomıka jáne bıýdjettik josparlaý basqarmasynyń basshysy Sáýle Qulymbetova sóz sóıledi.
«Jergilikti ózin-ózi basqarý organdarynyń jergilikti mańyzy bar máselelerdi sheshýdegi qarjylyq derbestigin keńeıtý maqsatynda aýyl ákimderine jergilikti ózin-ózi basqarý organdarynyń kiris kózderin qalyptastyrý jáne qolma-qol aqshany baqylaý shottaryn ashý quqyǵy beriledi. Bul baǵytta jergilikti ózin-ózi basqarýdyń qolma-qol baqylaý shottary barlyq 146 aýyldyq ákimdikte ashylady. Bıyl 10 aı ishinde jergilikti ózin-ózi basqarýdyń qolma-qol aqshany baqylaý shottaryna 736 mln teńge kóleminde qarajat tústi, onyń ishinde salyqtyń 6 túri boıynsha 720,2 mln teńge túsim jınaldy. Aıtylǵan ýaqyt ishinde jergilikti qoǵamdastyq máselelerin sheshý úshin 534,9 mln teńge jumsaldy»,- dedi S.Qulymbetova.
Belgili bolǵanyndaı, jergilikti ózin-ózi basqarý bıýdjeti aýdandyq mańyzy bar qala, aýyl, kent, aýyldyq okrýg deńgeıinde 2018 jyldan bastap halyq sany 2000 adamnan astam (66 eldi meken) ákimshilik aýmaqtyq birlikterde derbes bıýdjet engiziletin bolady. Al, 2020 jyldan bastap (88 eldi meken) halyq sany 2000-nan tómen jerlerde memlekettik bıýdjettiń 4 -deńgeıi engiziletin bolady.
Basqarma basshysy bıyldan bastap júzege asyryla bastaǵan «Barshaǵa arnalǵan tegin kásiptik-tehnıkalyq bilim» jobasy boıynsha keshendi is-sharalar qabyldanyp, jumystardyń atqarylyp jatqanyn aıtty.
Onyń aıtýynsha, tegin jumysshy mamandyǵyn alý boıynsha birinshi maqsatty tapta negizgi orta bilimi bar jastar qamtylsa, ekinshi maqsatty topqa kásibı bilimi joq, kolledjder men joǵary oqý oryndarynan oqýdan shyǵyp qalǵan jastar tartylady. Máselen, ústimizdegi jyly jergilikti bıýdjetten bólingen 3008 oryn, respýblıkalyq bıýdjetten 1515 oryn, barlyǵy 4603 oryn memlekettik tapsyrys negizinde 9 jáne 11 synypty bitirýshi túlekter tegin jumysshy mamandyǵyn alýǵa múmkindik alǵan.
Apparat májilisinde taǵy da basqa birneshe másele qaraldy. Jıyndy qorytqan oblys ákiminiń orynbasary Qýanyshbek Ysqaqov kún tártibinde kóterilgen máselelerge qatysty tıisti sala basshylary men aýdan, qala ákimderine oblys ákimi tarapynan tapsyrylǵan birqatar tapsyrmalar júktedi.
Eske salsaq, Memleket basshysynyń «100 naqty qadam» Ult josparynyń 98-qadamynda aýdandyq mańyzy bar qala, aýyl, kent jáne aýyldyq okrýg deńgeıinde jergilikti ózin-ózi basqarýdyń derbes bıýdjetin engizýdi tapsyrǵan bolatyn.
