Qyzylordada jer qoınaýyn zańsyz paıdalanýdyń 800-den asa deregi anyqtaldy
QYZYLORDA. QazAqparat - Búgin Óńirlik kommýnıkatsııalar qyzmetinde jer qoınaýyn zańsyz paıdalanýdy toqtatý boıynsha oblys ákiminiń tapsyrmasyn oryndaýǵa arnalǵan baspasóz máslıhaty ótti, dep habarlady QazAqparat HAA tilshisi.
Jıynda oblystyq Jerdiń paıdalanylýy men qorǵalýyn baqylaý basqarmasy basshysynyń orynbasary Qanatbek Serikbaev, Qyzylorda qalasy ákiminiń orynbasary Asylbek Shámenov baıandama jasady.
Usynylǵan málimet boıynsha, búgingi kúnge deıin Qyzylordada jer qoınaýyn óz betinshe paıdalanýdyń 800-den asa deregi anyqtalǵan.
Qanatbek Serikbaevtiń aıtýynsha, Qyzylorda qalasy men barlyq aýdandarda «Jol kartasyna» sáıkes jumysshy toptar qurylyp, onyń quramyna prokýratýra jáne múddeli memlekettik organ ókilderi engizildi.
«Memlekettik jer ýchaskesin nemese onyń bir bóligin zańsyz ıelený jeke tulǵalarǵa - 170 175 teńge, laýazymdy tulǵalarǵa, shaǵyn kásipkerlik sýbektilerine nemese kommertsııalyq emes uıymdarǵa - 340 350 teńge, iri kásipkerlik sýbektilerine 1 588 300 teńge kóleminde aıyppul salýǵa ákep soǵady. Sondaı-aq, óz betinshe ıelenip alǵan jer ýchaskesinde salynǵan qurylys QR JK-niń 164-1 babyna sáıkes buzylatyndyǵyn eskertemiz», - deıdi basqarma basshysynyń orynbasary.
Sonymen qatar brıfıngte jerdi basqa maqsatta paıdalanǵan nemese ony múlde paıdalanbaǵan ıelerge de shara qoldanylatyny aıtyldy.
