Qyzylordada JEO murjasy qulady, qutqarý jumystary júrgizilýde
ASTANA. QazAqparat - Qyzylorda qalasynda Jylý elektr ortalyǵynyń murjasy qulady, eki jumysshy zardap shekti, dep habarlaıdy QazAqparat.
«Aldyn ala málimet boıynsha, búgin saǵat 19.00-de Qyzylorda oblysyndaǵy JEO-da murjany buzý jumystaryn júrgizý barysynda, ol «Altyn LTD» JShS-nyń eki jumysshysynyń ústine qulap ketti. Olardyń biri oblystyq medıtsına ortalyǵyna jetkizildi, ekinshisi qırandylar astynda qalyp otyr. Qutqarý jumystary jalǵasýda», - dep málimdedi QR ІІM Tótenshe jaǵdaılar komıtetiniń resmı ókili Rýslan Imanqulov.
Onyń aıtýynsha, jumystarǵa Qyzylorda oblystyq TJD-nyń, Ońtústik óńirlik aeromobıldi jedel-qutqarý jasaǵynyń, Qyzylorda oblystyq TJD-nyń órtke qarsy jáne apattyq-qutqarý qyzmetteriniń mamandary men tehnıkalary jumyldyryldy.
Qazirgi ýaqytta qutqarý jumystarymen 60 adam, onnan astam tehnıka men eki kınologııalyq eseptop aınalysýda.
