Qyzylordada jeńil kólik pen avtobýs soqtyǵysty
QYZYLORDA. QazAqparat - Qyzylordada jeńil kólik pen avtobýs soqtyǵysty, dep habarlaıdy QazAqparat tilshisi.
Málim bolǵandaı, 12 jeltoqsan kúni Eleý Kósherbaev pen Ǵanı Muratbaev kósheleriniń qıylysynda «Daimler-190» kóligi men «PAZ-32054» markaly avtobýs soqtyǵysqan.
Áleýmettik jelide taraǵan vıdeoǵa sáıkes, jeńil kólik joldyń jıegine ushyp ketip, jekemenshik úıdiń qorshaýyna soǵylǵan. Qatty soqqydan onyń aldyńǵy bóligi jaramsyz kúıge túsken. Atalmysh fakti Qyzylorda qalalyq polıtsııa basqarmasynyń aqparattardy esepke alý kitabyna tirkeldi.
Zardap shekkender men qaza bolǵandar joq.
«Jol apatyna baılanysty «Daimler-190» markaly avtokólik júrgizýshisine Qazaqstan Respýblıkasy Ákimshilik quqyqbuzýshylyq týraly kodekstiń 610-baby boıynsha qujattar rásimdeldi», - dedi Qyzylorda oblystyq polıtsııa departamenti bastyǵynyń orynbasary Jaras Ospanov.
Tekserý jumystary jalǵasýda.
